ქართველმა ჯარისკაცებმა არაერთხელ დაამტკიცეს, რომ საქართველო საიმედო მეგობარი და ღირსეული პარტნიორია. ამის შესახებ საქართველოს პრეზიდენტმა, სალომე ზურაბიშვილმა "ღირსეული პარტნიორი 2020"-ის დახურვაზე სიტყვით გამოსვლისას განაცხადა.

მისი თქმით, საქართველო ნატო-ს სამაგალითო პარტნიორია, რომელიც სრულად იზიარებს ალიანსის ღირებულებებსა და უსაფრთხოების საერთო პრინციპებს.

"თანამშრომლობის ნათელი სიმბოლოა, რომ საქართველო, როგორც ერთ-ერთი უმსხვილესი კონტრიბუტორი ქვეყანა, განაგრძობს „მტკიცე მხარდაჭერის მისიაში“ მონაწილეობას. ქართველმა ჯარისკაცებმა არაერთხელ დაამტკიცეს, რომ საქართველო არის საიმედო მეგობარი და ღირსეული პარტნიორი რეგიონალური და გლობალური გამოწვევების დასაძლევად.

მინდა, ვისარგებლო შემთხვევით და აღვნიშნო, რომ ამერიკის შეერთებულ შტატებთან სტრატეგიული თანამშრომლობის გაღრმავება საქართველოს ერთ-ერთი და უმნიშვნელოვანესი პრიორიტეტია. ამერიკის შეერთებულ შტატებს მინდა მადლობა მოვახსენო განსაკუთრებული ნდობისა და მხარდაჭერისათვის.

წლების განმავლობაში განსაკუთრებული ძალისხმევა იყო მიმართული ორ ქვეყანას შორის თავდაცვისა და უსაფრთხოების მიმართულებით თანამშრომლობის გაღრმავებაზე, რომელიც დღეს თვისობრივად ახალ დონეზეა.

აქვე მინდა, მადლობა მოვახსენო ნატო-ს წევრ ქვეყნებს ეფექტიანი და დინამიური თანამშრომლობისათვის და ერთობლივ სამხედრო სწავლებებში მონაწილეობისათვის.

სწორედ თანამედროვე, ნატო-სთან თავსებადი თავდაცვის ძალები და პარტნიორებთან მჭიდრო თანამშრომლობა კიდევ უფრო გვაახლოებს ალიანსის წევრობასთან, რომელიც ჩვენი მყარი მიზანია", - განაცხადა სალომე ზურაბიშვილმა.