საქართველოს პრეზიდენტი სალომე ზურაბიშვილი სომხეთსა და აზერბაიჯანს შორის საბრძოლო მოქმედებების განახლებას ეხმიანება და შეშფოთებას გამოთქვამს. ამის შესახებ პრეზიდენტი მიკრობლოგ "ტვიტერზე" წერს.

"უაღრესად შეშფოთებული ვარ ცნობით აზერბაიჯანსა და სომხეთს შორის საბრძოლო მოქმედებების განახლების შესახებ. მხარეებს მშვიდობისკენ მოვუწოდებთ. სტაბილურობა და მშვიდობა ჩვენს რეგიონში უნდა იყოს ჩვენი საერთო მიზანი", - აცხადებს საქართველოს პრეზიდენტი.

სომხეთისა და აზერბაიჯანის საზღვარზე ვითარება დღეს დილიდან უკიდურესად დაიძაბა. მხარეები ერთმანეთს სამხედრო თავდასხმაში ადანაშაულებენ.

სომხეთი აცხადებს, რომ აზერბაიჯანმა დაიწყო შეტევა მთიან ყარაბაღზე.