ევროკავშირი შეშფოთებულია აზერბაიჯანსა და სომხეთს შორის საბრძოლო მოქმედებების განახლებით. ამის შესახებ მიკრობლოგ "ტვიტერზე" ევროკავშირის საბჭოს პრეზიდენტი შარლ მიშელი წერს.

შარლ მიშელი მხარეებს ცეცხლის დაუყოვნებლივ შეწყვეტისა და მოლაპარაკებების განახლებისკენ მოუწოდეს.

"საომარი მოქმედებების შესახებ ინფორმაცია მთიანი ყარაბაღის კონფლიქტის ზონიდან სერიოზულ შეშფოთებას იწვევს. სამხედრო მოქმედებები უნდა შეწყდეს, რათა თავიდან იქნას აცილებული ვითარების შემდგომი ესკალაცია. მოლაპარაკებების დაუყოვნებლივი განახლება, წინაპირობების გარეშე, ერთადერთი გამოსავალია", - დაწერა შარლ მიშელმა.

სომხეთისა და აზერბაიჯანის საზღვარზე ვითარება დღეს დილიდან უკიდურესად დაიძაბა. მხარეები ერთმანეთს სამხედრო თავდასხმაში ადანაშაულებენ.

აზერბაიჯანის თავდაცვის სამინისტრო იუწყება, სომხეთის მხრიდან დღეს დილით ფართომასშტაბიანი შეტევა განხორციელდა.

სომხეთი აცხადებს, რომ აზერბაიჯანმა დაიწყო შეტევა მთიან ყარაბაღზე.

ვრცელდება ინფორმაცია ორივე მხრიდან დაჭრილ და მოკლულ მშვიდობიან მოსახლეობასა და სამხედრო მოსამსახურეებზე.

სომხეთში გამოცხადდა საომარი მდგომარეობა და საყოველთაო მობილიზაცია.

აზერბაიჯანსა და სომხეთს შორის საბრძოლო მოქმედებების განახლებას ეხმიანებიან საქართველოს პრეზიდენტი სალომე ზურაბიშვილი და საგარეო საქმეთა სამინისტრო.