საფრანგეთის პრეზიდენტმა ემანუელ მაკრონმა გაზეთ Le Journal du Dimanche -თან ინტერვიუში განაცხადა, რომ ალიაქსანდრ ლუკაშენკამ ბელარუსის პრეზიდენტის პოსტი უნდა დატოვოს.

 „ის რაც ბელარუსში ხდება, ხელისუფლების, ავტორიტარული ხელისუფლების კრიზისია, რომელსაც არ შეუძლია მიიღოს დემოკრატიის ლოგიკა და ცდილობს ქვეყნის სათავეში ძალის გამოყენებით დარჩეს. ცხადია, ლუკაშენკა უნდა წავიდეს“, - განაცხადა მაკრონმა.

ამის გარდა საფრანგეთის პრეზიდენტმა ხაზი გაუსვა, რომ ბელარუსის მომიტინგეების სიმამაცით აღფრთოვანებულია. „მათ კარგად ესმით რისკი, რაზეც მიდიან ყოველ უქმეებზე დემონსტრაციების გამართვისას. ქალები, რომლებიც ყოველ შაბათს  აქციებს აწყობენ, პატივისცემას იმსახურებენ“, - აღნიშნა მაკრონმა.

ბელარუსში მასობრივი საპროტესტო აქციები 9 აგვისტოს პრეზდენტის არჩევნების შემდეგ დაიწყო.

აქციის მონაწილეები არჩევნების შედეგებს არ ეთანხმებიან და ხელახალი არჩევნების დანიშვნას მოითხოვენ.

ევროკავშირი არჩევნების შედეგებს არ ცნობს და ლუკაშენკას ლეგიტიმურ პრეზიდენტად არ აღიარებს.