პროცესში, რომელიც უკავშირდებოდა კომისიის ფარგლებში საზღვრის დემარკაციის საკითხს, ყველა შეთანხმება მოხდა ჩვენი ქვეყნის ინტერესების საზიანოდ, ამიტომ ბუნებრივად გაჩნდა და გაუჩნდა საგამოძიებო ორგანოებს კითხვა, ხომ არ იყო აქ რაიმე მიზანმიმართული ქმედება სახელმწიფოს ინტერესების საწინააღმდეგოდ, – განაცხადა პარლამენტის თავდაცვის და უსაფრთხოების კომიტეტის თავმჯდომარემ, ირაკლი სესიაშვილმა.

სესიაშვილი ამბობს, რომ ხელიუფლებას აზერბაიჯანთან კონსტრუქციული თანამშრომლობა აქვს, რომლის მიზანს საართლიანობის დადგენა წარმოადგენს.

„ამ რუკის არც მოძიება მომხდარა და რიგ შემთხვევებში ეს რუკები დაკარგულია, დამალულია. თუ სურვილი არ ჰქონდათ, რუკა გამოეყენებინათ, ესეც ეჭვებს აჩენს. ჩვენი ქვეყნის ინტერესებზე, ტერიტორიებზე და სიწმინდეებზე ვსაუბრობთ, რაზეც თავის დროზე წინა ხელისუფლება გვარწმუნებდა, რომ ჩვენი ტერიტორია არ არის და საბჭოთა კავშირის დროს ეკუთვნოდა მეზობელ ქვეყნებსო. ჩვენ აზერბაიჯანთან ძალიან კონსტრუქციული თანამშრომლობა გვაქვს და მიზანი არ არის ერთმანეთს ტერიტორიები წავართვათ, არამედ სამართლიანად დადგინდეს ის, რაც შეთანხმებითაა მიღწეული“, – განაცხადა სესიაშვილმა.

საქართველოს პროკურატურამ გუშინ გაავრცელა განცხადება, რომ უცხო ქვეყნისთვის საქართველოს ტერიტორიის ნაწილის გადაცემისკენ მიმართული მოქმედების ფაქტზე პროკურატურაში გამოძიება მიმდინარეობს.