საგურამოში გამართულ შეხვედრაზე „ქართული ოცნების“ ნაწილი კახი კალაძეს დაუპირისპირდა და მათ მხარი ივანიშვილმაც დაუჭირა , - ამის შესახებ „პრაიმნიუსჯორჯიას“ „ქართული ოცნების“ ერთ-ერთმა დეპუტატმა განუცხადა, რომელიც ამ შეხვედრას ესწრებოდა.

წყაროს ინფორმაციით, მმართველი გუნდის რამდენიმე წევრს უკმაყოფილება კალაძის ქცევის გამო გამოუთქვამს. მათი თქმით, ღარიბაშვილის წასვლის შემდეგ კალაძე გუნდში ლიდერობას ცდილობს და ამასობაში საკუთარი ინტერესების გატარებით არის დაკავებული.

ამასთან, მათ ივანიშვილთან ისიც უთქვამთ, რომ კალაძე „ნაციონალების“ საქმეს აკეთებს და ასე ცდილობს, რომ სამომავლოდაც გარანტიები შეიქმნასო. ივანიშვილი კი ყველაზე მეტად ამის გამო გაბრაზებულა, რასაც უკვე „გაზპრომთან“ დაწყებული მოლაპარაკებების საკითხი მოჰყვა. საბოლოო ჯამში კი საქმის გახმაურება კალაძეს დაბრალდა და ივანიშვილს უთქვამს, რომ ეს თემაც ჩააგდოო.

ამიტომაც, „ქართული ოცნება“ ელოდება, რომ „გაზპრომის“ საკითხზე პასუხისმგებლობის აღება მთლიანად კალაძეს მოუწევს და დასავლელ პარტნიორებთანაც იმას იტყვიან, რომ ეს მისი პირადი ინიცაატივა იყო.

რაც მთავარია, როგორც ამბობენ, უკვე გადაწყვეტილია, რომ პირველივე სამთვრობო ცვლილებაზე თანამდებობას მასაც დაატოვებინებენ.

შეხვედრას ყოფილი პრემიერ-მინისტრი ირაკლი ღარიბაშვილიც ესწრებოდა, რომელსაც, წყაროს ცნობით, კალაძეზე საუბარს ჩუმად ისმენდაო. როგორც ცნობილია, ის და კალაძე დაპირისპირებულები იყვენენ და მისი მოხსნის ერთ-ერთ ვარიანტად, ამ დაპირისპირებაში, კალაძის გამარჯვება სახელდებოდა.