ევროკავშირის ლიდერები შეთანხმდნენ სანქციების დაწესებაზე ბელარუსი ოფიციალური პირების მიმართ, რომლებიც პასუხისმგებელნი არიან არჩევნების გაყალებებასა და ადამიანის უფლებათა დარღვევებზე. ამის შესახებ ევროსაბჭოს პრზეიდენტმა შარლ მიშელმა ევროკავშირის სამიტის პირველ დღეს განაცხადა. სანქციები ძალაში 2 დღეიდან შევა.

 „გადავწყვიტეთ ავამოქმედოთ სანქციები, რომლებიც აგვისტოში შევათანხმდეთ. ეს ნიშნავს, რომ 2 ოქტომბერს ამოქმედდება დაახლოებით 40-კაციანი შავი სია“, - განაცხადა მიშელმა. მისი თქმით, ალიაქსანდრ ლუკაშენკა სანქცირებულთა სიაში არ არის.

თავის მხრივ საფრანგეთის პრეზიდენტმა ემანუელ მაკრონმა აღნიშნა, რომ ევროკავშირმა ლუკაშენკას წინააღმდეგ სანქციები არ დააწესა, რადგან ეს დააზიანებდა ბრიუსელის მოთხოვნას ოპოზიციასთან დიალოგის დაწყებისა და პოლიტპატიმრების გათავისუფლების შესახებ.

ევროკავშირმა 40 ბელარუსი ჩინოვნიკის წინააღმდეგ სანქციების შემოღება 19 აგვისტოს დააანონსა.

მანამდე ბელარუსის მაღალი თანამდებობის პირების მიმართ სანქციები დააწესა ესტონეთმა, ლატვიამ და ლიეტუვამ.

სამივე ქვეყნის ხელისუფლება აცხადებს, რომ, სიაში შეყვანილი პირები დამნაშავეები არიან არჩევნების შედეგების გაყალბებასა და დემონსტრანტების წინააღმდეგ ძალადობაში. 25 სექტემბერს ლატვიამ და ესტონეთმა გააფართოვეს სანქცირებულთა სია 101-მდე. ლუკაშენკას სანქციები დაუწესა დიდმა ბრიტანეთმა და კანადამ.