საგარეო უწყება სირიაში ოკუპირებული აფხაზეთის ე.წ. საელჩოს გახსნას სრულიად უკანონო გადაწყვეტილებას უწოდებს. ამის შესახებ საგარეო საქმეთა სამინისტროს განცხადებაშია ნათქვამი.

"სირიაში ოკუპირებული აფხაზეთის ე.წ. საელჩოს გახსნა წარმოადგენს იმ სრულიად უკანონო გადაწყვეტილების გაგრძელებას, რომელიც ასადის რეჟიმმა რუსეთის ზეწოლის შედეგად მიიღო 2018 წელს. აღნიშნული უკანონო გადაწყვეტილების გამო საქართველომ სირიასთან დიპლომატიური ურთიერთობები გაწყვიტა.

საერთაშორისო თანამეგობრობამ მკაცრად დაგმო ასადის რეჟიმის უკანონო გადაწყვეტილება სოხუმსა და ცხინვალში რუსეთის საოკუპაციო რეჟიმებთან ე.წ. დიპლომატიური ურთიერთობების დამყარების თაობაზე.

არალეგიტიმურ გადაწყვეტილებას მკაფიოდ გაემიჯნენ სირიის ოპოზიციური ძალებიც, რომელთაც მხარი დაუჭირეს საქართველოს ტერიტორიულ მთლიანობას", - ნათქვამია განცხადებაში.

ოკუპირებული აფხაზეთის დეფაქტო ხელისუფლების ცნობით, დამასკოში ე.წ. საელჩო დღეს გაიხსნება.