აზერბაიჯანის თავდაცვის სამინისტროს განცხადებით, მთელი ღამის განმავლობაში ყარაბაღში ინტენსიური ბრძოლები მიმდინარეობდა.

უწყების მონაცემებით, სამხედრო მოქმედებების შედეგად აზერბაიჯანულმა ძალებმა გაანადგურეს სომხეთის შეიარაღებული ძალების მე-5 სამთომსროლელი პოლკის შტაბის შენობა.

უწყებაში ამტკიცებენ, რომ ევაკუირებულია სომხეთის ძალების სამხედრო ნაწილების პირადი შემადგენლობა, რომლებმაც ქალაქ ხანკენდიზე იერიშის დროს აზერბაიჯანული დანაყოფებისგან დიდი დანაკარგი მიიღეს, სამინისტროს ინფორმაციით, განადგურებულია 13 ტანკი, 2 ჯავშანტრანსპორტიორი, ოთხი ერთეული რეაქტიული სისტემა „გრადი“, ორი ერთეული თვითმავალი საარტილერიო დანადგარი და დიდი რაოდენობით საავტომობილო ტექნიკა.

სომხეთის თავდაცვის სამინისტროს პრესმდივნის შუშან სტეპანიანის განცხადებით, ყარაბაღში, შეხების ხაზზე ღამით სტაბილურად დაძაბული ვითარება იყო.

„ღამე კონფლიქტის ზონაში შედარებით სტაბილურად დაძაბული იყო. ოპერატიულ-ტაქტიკური ვითარება უცვლელი დარჩა. ცალკეულ მონაკვეთებზე მიმდინარეობდა ორმხრივი საარტილერიო სროლა. მოწინააღმდეგემ სარაკეტო-საარტილერიო დარტყმები განახორციელა დასახლებული პუნქტების მიმართულებით“, - წერს სტეპანიანი „ფეისბუქზე“.