ყირგიზეთის პრეზიდენტი სოორონბაი ჟეენბეკოვი გადადგა. ამის შესახებ ნათქვამია ჟეენბეკოვის მიმართვაში, ინფორმაციას პრეზიდენტის პრესსამსახური ავრცელებს.

ერისადმი მიმართვაში ჟეენბეკოვი აღნიშნავს, რომ მისთვის ქვეყანაში მშვიდობა და საზოგადოების ერთიანობა, თითოეული თანამემამულის სიცოცხლე ყველაზე ძვირფასია.

"ძალაუფლებას არ ვეჭიდები. მე არ მსურს ყირგიზეთის ისტორიაში დავრჩე პრეზიდენტად, რომელმაც საკუთარ ხალხს ესროლა და საკუთარი ხალხის სისხლი დაღვარა, ამიტომ გადავწყვიტე გადადგომა", - ნათქვამია მიმართვაში.

ჟეენბეკოვმა მოუწოდა დემონსტრანტებსა და სამართალდამცავებს, რომ არ დაუშვან სისხლისღვრა.

მანამდე ცნობილი გახდა, რომ ყირგიზეთის ახალი პრემიერ-მინისტრი სადირ ჟაპაროვი ჟეენბეკოვს გადადგომისკენ მოუწოდებდა, მაგრამ პრეზიდენტი არ თანხმდებოდა.

არეულობა ბიშკეკში 5 ოქტომბრის საღამოს დაიწყო მას შემდეგ, რაც საპარლამენტო არჩევნების ოფიციალური შედეგები გამოცხადდა.

ოპოზიციური პარტიების მხარდამჭერები 4 ოქტომბერს გამართული პარლამენტის არჩევნების შედეგების გაუქმებას და ხელახალ კენჭისყრას მოითხოვდნენ. აქციის დაშლის დროს შეტაკება მოხდა მომიტინგეებსა და სამართალდამცველებს შორის, მომიტინგეები შეიჭრნენ პარლამენტისა და პრეზიდენტის ადმინისტრაციის შენობაში.

მოგვიანებით, ყირგიზეთის ცესკო-მ ბათილად ცნო საპარლამენტო არჩევნების შედეგები.

ფოტო: TASS