ჯანდაცვის მსოფლიო ორგანიზაციის ხელმძღვანელი ტედროს ადჰანომ გებრეიესუსი აცხადებს, რომ  კორონავირუსის გავრცელების გამო უახლოესი თვეები ძალიან მძიმე იქნება.

„COVID-19-ის პანდემიის კრიტიკულად მნიშვნელოვან გზაჯვარედინზე ვიმყოფებით, განსაკუთრებით ჩრდილოეთ ნახევარსფეროში. მომდევნო რამდენიმე თვე ძალიან მძიმე იქნება, ზოგიერთი ქვეყანა საშიშ ტრაექტორიაზე იმყოფება“, - განაცხადა გებრეიესუსმა.

როგორც ჯანდაცვის მსოფლიო ორგანიზაციის დირექტორმა განმარტა, ბევრი ქვეყანა დაავადების მკვეთრ ზრდას შეეჯახა, რაც ძალიან მალე ჯანდაცვის სისტემის რესურსების ამოწურვას მოასწავებს.

მან მსოფლიო ლიდერებს მოუწოდა მიიღონ სასწრაფო ზომები და შეაჩერონ სიკვდილობის ზრდა და COVID-19-ით გამოწვეული კოლაფსი.

ჯანდაცვის მსოფლიო ორგანიზაციის ბოლო მონაცემებით, მსოფლიოში დადასტურებულია კორონავირუსის 41,5 მილიონზე მეტი შემთხვევა, გარდაიცვალა 1,13 მილიონზე მეტი პაციენტი. ინფიცირების შემთხვევათა რაოდენობით ლიდერობენ აშშ, ინდოეთი, ბრაზილია და რუსეთი.