აშშ-ის პრეზიდენტმა დონალდ ტრამპმა განაცხადა, რომ ხმების დათვლის დროს დამკვირვებლებს თავიანთი სამუშაოს შესრულების შესაძლებლობას არ აძლევდნენ.

ტრამპი და მისი გუნდის წარმომადგენლები ხმების დათვლაზე რესბუბლიკელების დამკვირვებლების დაშვებას, ვისკონსინში კი ხმების გადათვლას  მოითხოვენ. მოქმედი პრეზიდენტი აცხადებს, რომ რამდენიმე შტატში, სადაც მისი ოპონენტი ჯო ბაიდენი ერთ ღამეში დაწინაურდა, თაღლითობას და დარღვევებს ჰქონდა ადგილი.

 „მე მარტივად ვიგებ აშშ-ის საპრეზიდენტო არჩევნებს კანონიერი ხმებით. დამკვირვებელებს არ აძლევდნენ თავიანთი სამუშაოს შესრულების შესაძლებლობას, ამიტომ ამ პერიოდის განმავლობაში მიღებული ხმები უკანონოდ უნდა იყოს აღიარებული. აშშ-ის უმაღლესმა სასამართლომ უნდა გადაწყვიტოს“, - დაწერა ტრამპმა Twitter-ზე.

მანამდე ეუთოს სადამკვირებლო მისიამ განაცხადა, რომ აშშ-ს საპრეზიდენტო არჩევნებზე მნიშვნელოვანი დარღვევები არ ყოფილა.

ხმის დათვლის პროცესი  ხუთ შტატში ამ დრომდე გრძელდება. ამ მომენტისთვის ჯო ბაიდენს 264 ხმა აქვს, დონალდ ტრამპს კი 214. პრეზიდენტობისთვის 538-წევრიანი კოლეგიიდან მინიმუმ 270 ხმის მოპოვებაა საჭირო.