"ქართული ოცნება" ისნის საოლქო კომისიის გარდაცვალებას "ნაციონალურ მოძრაობას" უკავშირებს და გამოძიების დაწყებას ითხოვს.

პარტიის ოფისში გამართულ ბრიფინგზე, "ქართული ოცნების" საარჩევნო სიის წევრმა, გიორგი ხელაშვილმა განაცხადა, რომ "ნაციონალური მოძრაობის" აქტივისტები რეპრესიებით ემუქრებოდნენ ისნის საოლქო საარჩევნო კომისიის თავმჯდომარეს, რომელიც გარდაიცვალა.

გიორგი ხელაშვილმა სამართალდამცავ ორგანოებს გამოძიების დაუყოვნებლივ დაწყებისკენ მოუწოდა.

"სულ სხვა თემით ვაპირებდით დღევანდელი ბრიფინგის დაწყებას, მაგრამ სამწუხაროდ, საუბედუროდ გვიწევს ძალიან შემაშფოთებელი ინფორმაციით დაწყება. დაიღუპა ისნის საოლქო საარჩევნო კომისიის თავმჯდომარე თედო გობეჯიშვილი, რომელი ამ სამსახურში მუშაობდა 2006 წლიდან და 43 წლის ასაკში გარდაიცვალა.

ჩვენი ინფორმაციით, „ნაციონალური მოძრაობის“ აქტივისტები გუშინ რამდენიმე საოლქო საარჩევნო კომისიის თავმჯდომარეს რეპრესიებით ემუქრებოდნენ, ზეწოლისა და მუქარის გამოყენებით. ერთ-ერთი ამგვარი ზეწოლის შემთხვევა მოხდა ისნის საოლქო კომიისიის თავმჯდომარის მიმართ, რომელიც გარდაიცვალა. სამართალდამცველებს მოვუწოდებთ, დაუყოვნებლივ აღძრან სისხლის სამართლის საქმე ამ მიმართულებით", - განაცხადა ხელაშვილმა.

შეგახსენებთ, ცენტრალური საარჩევნო კომისიის ინფორმაციით, 43 წლის ასაკში მოულოდნელად გარდაიცვალა ისნის საოლქო საარჩევნო კომისიის თავმჯდომარე თედორე გობეჯიშვილი.