აშშ-ის პრეზიდენტ დონალდ ტრამპის ადვოკატმა რუდი ჯულიანიმ განაცხადა, რომ 2020 წლის საპრეზიდენტო არჩევნებზე დარღვევები არ იყო ცალკეული შემთხვევბი. მისივე განცხადებით, სავარაუდოდ არსებობდა „თაღლითობის ცენტრალიზებული გეგმა“. ამის შესახებ  მან პრესკონფერენციაზე განაცხადა.

მისი თქმით, გამოძიებით დაადგინეს, რომ ეს არ იყო ცალკეული დარღვევები ერთ კონკრეტულ შტატში, არამედ დარღვევების ჯაჭვი ქვეყნის მთელ ტერიტორიაზე.

„ეს სქემა მეორდება ბევრ შტატში, ეს იდენტური სქემაა, რომლის არსებობაც საფუძველს აძლევს ნებისმიერ გამომძიებელს, ან პროკურორს ივარაუდოს, რომ არსებობს გეგმა“, – განაცხადა რუდი ჯულიანიმ.

აშშ-ის საპრეზიდენტო არჩევნები 3 ნოემბერს გაიმართა. 

იმის მიუხედავად, რომ ჯო ბაიდენი გამოცხადდა საპრეზიდენტო არჩევნებში გამარჯვებულად, ტრამპი ჯერ კიდევ არ აღიარებს მისი დემოკრატი მეტოქის გამარჯვებას.

შეერთებული შტატების მოქმედი პრეზიდენტი, ყოველგვარი მტკიცებულების გარეშე ამტკიცებს, რომ სულ მცირე 2.7 მილიონი ხმა "მოპარეს".

მისი თქმით, მაქინაციების ამ სქემის რეალიზაცია ხდებოდა დიდ ქალაქებში, რომლებსაც დემოკრატები აკონტროლებენ. მისივე თქმით, ეს ის ქალაქებია, რომლებიც ცნობილია კორუფციით.

მან განსაკუთრებით გამოყო ფილადელფია და დეტროიტი, სადაც ტრამპის წარმომადგენლის თქმით, განსაკუთრებით ბევრი დარღვევა იყო დაფიქსირებული.