თურქეთში საქართველოს ელჩი გიორგი ჯანჯღავა მოქალაქეებს შეზღუდვებთან დაკავშირებით აფრთხილებს.

„თურქეთის რესპუბლიკაში მყოფ საქართველოს მოქალაქეთა საყურადღებოდ! თურქული მხარის გადაწყვეტილებით, კორონავირუსის გავრცელების პრევენციის ფარგლებში, ქვეყნის მასშტაბით, მოქალაქეებს ქუჩაში გასვლა ეკრძალებათ ორშაბათიდან პარასკევის ჩათვლით 21:00-დან 05:00 საათამდე, ხოლო შაბათ-კვირას კი, პარასკევის 21:00-დან ორშაბათის 05:00 საათამდე.

აღნიშნული რეგულაცია ძალაში შედის პირველ დეკემბერს, 21:00 საათიდან! ზემოაღნიშნული წესის დამრღვევი პირი დაჯარიმდება!“,- წერს ელჩი „ფეისბუქზე“.

კორონავირუსით ინფიცირებულთა როადენობის ზრდის გამო თურქეთში შეზღუდვები გამკაცრდა. სამშაბათიდან მუშაობას წყვეტენ აბანოები, საუნები, საცურაო აუზები, სპორტდარბაზები, სავაჭრო ცენტრებში მომხმარებლების მხოლოდ გარკვეული რაოდენობა დაიშვება.

ბოლო 24 საათში თურქეთში კორონავირუსით ინფიცირების 30 103 შემთხვევა გამოვლინდა, გარდაიცვალა 185 ადამიანი.