ევროპაში აშშ-ის არმიის ყოფილი მთავარსარდლის, გადამდგარი გენერლის ბენ ჰოჯესის განცხადებით, დასავლეთისთვის სასარგებლო იქნება თუ საქართველო ალიანსის წევრი გახდება. ამის შესახებ ბენ ჰოჯესმა "ქრონიკის" ვაშინგტონის ბიუროსთან განაცხადა.

მისი თქმით, საქართველო უნდა იქცეს გარკვეული ტიპის ლოჯისტიკურ ჰაბად, რომელიც ამერიკულ სამხედრო ხომალდებს მიიღებს პორტებში.

"ჩემი სამხედრო თვალსაზრისით გეტყვით, რომ საქართველომ ყველაფერი გააკეთა და დგას სწორ გზაზე ყველა კატეგორიაში. მე ვგრძნობ შავი ზღვის სტრატეგიული მნიშვნელობის მზარდ აღიარებას ნატოს შიგნით, ამიტომ ვთვლი, რომ საქართველო ოპტიმისტურად უნდა იყოს განწყობილი, თუმცა დარჩეს რეალისტი იმ ფაქტის მიმართ, რომ მოსკოვს საქართველოს ნატოში ან ევროკავშირში გაწევრიანება არ სურს. ვისურვებდი ვიხილო შეერთებული შტატების მიერ საქართველოში სამხედრო ინფრასტრუქტურის განთავსება, რა თქმა უნდა, ქართული მხარის შეთავაზების შედეგად, მაგალითად საჰაერო ბაზა, რომელიც კიდევ უფრო მიმზიდველს გახდის საქართველოს დასავლელი პარტნიორების სამხედრო საჰაერო მიმოსვლისთვის. ასევე საქართველო უნდა იქცეს გარკვეული ტიპის ლოჯისტიკურ ჰაბად, რომელიც ამერიკულ სამხედრო ხომალდებს მიიღებს პორტებში. როცა მესმის, საქართვლოს ნატოში გაწევრიანების ოპონენტების არგუმენტი, რომ რადგან საქართველოში რუსეთის ჯარი დგას, ამის გამო ვერ განხორციელდება წევრობა, ყოველთვის ვამბობ, ხოლმე რომ გერმანია 2 ნაწილად იყო გაყოფილი და აღმოსავლეთ გერმანიაში საბჭოთა ჯარების ყოფნის მიუხედავად, დასავლეთ გერმანია მაინც გახდა ნატოს წევრი. ამიტომ ვთვლი, რომ ეს პრეცედენტი მხედველობაში უნდა მიიღონ საქართველოსთან მიმართებაში და რუსეთის ჯარების ქვეყნის ტერიტორიაზე არსებობა არ უნდა იყო ნატოში გაწევრიანებისათვის საქართველოს დისკვალიფიკაციის მიზეზი", - განაცხადა ბენ ჰოჯესმა.