„ევროპული საქართველოს“ ერთ-ერთი ლიდერის, გიგი უგულავას განცხადებით, ვერ წარმოუდგენია, რომ ოპოზიციიდან ვინმემ პარლამენტში შესვლის გადაწყვეტილება მიიღოს, თუმცა ყველაფერს უშვებს.

უგულავას თქმით, პარლამენტში თუ ვინმე შევა, მან პოლიტიკური პასუხისმგებლობაც უნდა აიღოს.

"ვხედავთ, რომ ზეწოლაა, იქიდან, აქედან ექაჩებიან და რაღაცა მამაძაღლობებს ვხედავთ. არ დავფარავ, მამაძაღლობები მიდის, ხალიჩის ქვეშ მამაძაღლობები მიდის. გამოდით და თქვით, რომ მე მინდა შესვლა და შედით. შედი, ოღონდ პოლიტიკური პასუხისმგებლობა შენ თავად აიღე იმაზე, რასაც... მომდევნო 4 წელიწადი, ქუჩაში გამვლელი ადამიანი თვალებში რომ შეგხედავს და შეგაფურთხებს, უნდა დახარო თავი და კი ბატონო, ჩემი იპოთეკის პრობლემა მქონდა და შევედი პარლამენტში, შედი. თუ მარტო იპოთეკის ჭმუნვაა ეს ქვეყანა და აბა, მე სახლში დავჯდე და ხაჭაპური ვაცხო, მაშინ შედი. უბრალოდ, მაშინ შენი ხაჭაპური და არც შენი პოლიტიკა არავის მოუნდება. ერთი თვე ადამიანებს ეუბნები გაყალბდაო და ახლა შეიძლება, რაღაცა ყანყალი... როგორ შეიძლება ასეთ დროს ყანყალი", - თქვა გიგი უგულავამ ტვ პირველის ეთერში.