"ევროპული საქართველოს" ერთ-ერთი ლიდერი, გიგა ბოკერია მიიჩნევს, რომ ხელისუფლება ცდილობს, ISFED-ის შეცდომა მის გასანადგურებლად გამოიყენოს.

გიგა ბოკერიას შეფასებით, ხელისუფლებას მისთვის არასასურველი, დამოუკიდებელი ორგანიზაციის ჩამოშორება უნდა.

"ეს არის დამახასიათებელი ყველა ამ ტიპის ავტორიტარული რეჟიმისთვის - პუტინის რუსეთი, ასლან აბაშიძე, რომ ყველა ვითარების გამოყენებას ცდილობ დისკრედიტაციისთვის. როგორი შეცდომაც არ უნდა მოსვლოდათ, ეს რეაქცია მეტყველებს იმაზე, რა ტიპის რეჟიმთან გვაქვს საქმე. ერთია შეცდომა და მეორეა ხელისუფლება, რომელსაც ამ შეცდომის გამოყენება უნდა მისთვის არასასურველი დამოუკიდებელი ორგანიზაციის განადგურებისთვის,"- ამბობს გიგა ბოკერია.

სამართლიანი არჩევნების სამეთვალყურეო საბჭოს წევრებმა ორგანიზაციაში გამართულ ბრიფინგზე დაადასტურეს, რომ ელენე ნიჟარაძე აღარ არის ISFED-ის ხელმძღვანელი.

სამართლიანი არჩევნების გამგეობა მიიჩნევს, რომ ხმების პარალელური დათვლისას დაშვებული ხარვეზი ადამიანური შეცდომაა.

უმრავლესობის ლიდერის ირაკლი კობახიძის თქმით, "ამ სიყალბის მიზეზების შესახებ" განმარტება ძალიან სუსტი იყო. უმრავლესობის ლიდერი მიიჩნევს, რომ პარალელური დათვლისას მოხდა არა შეცდომა, არამედ შეგნებული მანიპულაცია ორგანიზაციის მხრიდან.