ესპანეთის მელილიას ავტონომიურ ოლქში, რომელიც ჩრდილოეთ აფრიკაში მდებარეობს, დიქტატორ ფრანსისკო ფრანკოს უკანასკნელი ქანდაკება აიღეს. ინფორმაციას BBC ვრცელებს.

მელილიას ასამბლეის წევრმა ელენა ფერნანდეს ტრევინომ ფრანკოს ძეგლის დემონტაჟს ისტორიული დღე უწოდა. დემონტაჟის წინააღმდეგი იყო მხოლოდ ერთი პარტია. პარტია „ხმის“ წევრები მისი აღების მოწინააღმდეგნი იყვნენ და ამტკიცებდნენ, რომ 1978 წელს აღმართულმა ძეგლმა უკვდავყო ფრანკოს, როგორც ესპანეთის ლეგიონის მეთაურის როლი რიფის ომში, რომელსაც ესპანეთი 1920-იან წლებში მაროკოში ბერბერთა ტომების წინააღმდეგ აწარმოებდა.

2007 წელს ხელისუფლებამ მიიღო კანონი, რომლის თანახმად, დიქტატორ ფრანკოს სიმბოლოები ეტაპობრივად უნდა განადგურდეს.

ფრანკო დაკრძალული იყო მადრიდის სიახლოვეს, მავზოლეუმში, 1930-იანი წლების სამოქალაქო ომის ათი ათასობით მსხვერპლთა გვერდით. 2019 წელს ესპანეთის ხელისუფლების გადაწყვეტილებით, ფრანკოს ნეშტი გადაასვენეს მინგორუბიოს სასაფლაოზე, მადრიდში. დიქტატორის შთამომავლებმა სასამართლოში აღნიშნული გადაწყვეტილება გაასაჩივრეს, თუმცა წინაპარს პირველი სამარხი ვერ შეუნარჩუნეს.

ფრანკო ხელისუფლებაში 1936-1939 წლების სამოქალაქო ომის შემდეგ მოვიდა. ის ესპანეთის  ნომინალურად აღდგენილი სამეფოს დე ფაქტო რეგენტი გარდაცვალებამდე - 1975 წლამდე იყო. ფრანკოს გარდაცვალების შედეგ ქვეყანაში აღდგა მონარქია.