ქართული ოცნების თავმჯდომარემ, ირაკლი კობახიძემ კრისტიან დანიელსონთან მმართველი გუნდის წარმომადგენლების შეხვედრის დაწყებამდე განაცხადა, რომ გუშინ შეხვედრის დასრულებისას დანიელსონმა მათ უთხრა, რომ ის მეორე დილით, ტოვებდა ქვეყანას, თუმცა, დარჩენა გადაწყვიტა.

"გუშინ შეხვედრის დასრულებისას გვითხრა ჩვენ ბატონმა დანიელსონმა, რომ ის მეორე დილით, ანუ დღეს დილით, ტოვებდა ქვეყანას, თუმცა, როგორც ჩანს, შემდეგ იყო გარკვეული კონსულტაციები და მან გადაწყვიტა საქართველოში დარჩენა, რის შესახებაც დაახლოებით 10 წუთის შემდეგ, მას შემდეგ რაც ჩვენ კომენტარები გავაკეთეთ, შეგვატყობინა პირველ რიგში ჩვენ, რაც არის ძალიან კარგი. ეს ნიშნავს, რომ ძალიან დიდი სერიოზულობით ეკიდება ევროკავშირი დიალოგს", - თქვა კობახიძემ.

გუშინ, 14 მარტს ქართულ ოცნებასთან შეხვედრის შემდეგ კრისტიან დანიელსონმა განაცხადა, რომ პროცესების კიდევ უფრო წინ წაწევისთვის, მისი ვიზიტი საქართველოში ერთი დღით გახანგრძლივდება.