"ქართული ოცნების" დეპუტატი გიორგი ხელაშვილი აცხადებს, რომ რიგგარეშე არჩევნები არის ქიმერა, მითი და ეს ოპოზიციამაც ძალიან კარგად იცის. ამის შესახებ ხელაშვილმა "რუსთავი 2"-ის ეთერში ისაუბრა.

ხელაშვილის განცხადებით, ხელისუფლება რიგგარეშე არჩევნებს იმ ფორმით, რა ფორმითაც მას ოპოზიცია ითხოვს, არ დათანხმდება.

"მე კარგად ვიცი ჩვენი ევროპელი პარტნიორების პოზიციები. მათი მანტრა, მათი ძირითადი მიდგომა არის ის, რომ შეუძლებელია მოლაპარაკების მაგიდასთან შეიცვალოს ხალხის მიერ გამოხატული ნება, რაც გამოიხატა არჩევნების შედეგებში. დარწმუნებული ვარ, ოპოზიციამაც კარგად იცის, რომ რიგგარეშე არჩევნები არის ქიმერა, მითი.

იმ 6 პუნქტში არჩევნების შესახებ არის მხოლოდ და მხოლოდ მინიშნებული, რომ არის მოლაპარაკების ერთ-ერთი საკითხი და იქ წერია "შესაძლო რიგგარეშე არჩევნები", რომელიც იქვეა მიბმული ადგილობრივ არჩევნებთან. ამის გარშემო რა კონფიგურაციით მოხდება შეთანხმება, მოლაპარაკების საგანია.

პარტიის პოლიტსაბჭოს ცალსახა გადაწყვეტილება, რამდენადაც ვიცი, არის ის, რომ იმ ფორმით, რა ფორმითაც ითხოვს ოპოზიცია რიგგარეშე არჩევნებს, რომ ხვალ გადავწყვიტოთ, რომ ეს არჩევნები არ იყო სამართლიანი და მოდი დავნიშნოთ ახალი არჩევნები, ასეთი რამ, რა თქმა უნდა, არ არის გათვალისწინებული,"-აცხადებს ხელაშვილი.