კრემლის პროპაგანდისტმა ვლადიმირ პოზნერმა, მეგობრებთან ერთად საქართველო რამდენიმე წუთის წინ, დაგეგმილზე ადრე დატოვა. ​პოზნერი თბილისიდან გამგზავრებას 3 აპრილს აპირებდა.

ხმაურიანი პროტესტის გამო რუსი ჟურნალისტისა და მისი თანხმლები პირების გამოყვანა სასტუმრო "რუმს ჰოტელიდან" სამართალდამცველების კორდონის დახმარებით მოხდა. შეკრებილებმა ავტობუსს კვერცხები დაუშინეს.

ვლადიმირ პოზნერი, რომელსაც ეკუთვნის ფრაზა, "აფხაზეთი აღარასდროს იქნება საქართველოს ნაწილი", საქართველოში გუშინ, 31 მარტს ჩამოვიდა. ვლადიმირ პუტინის მხარდამჭერი, 50-მდე პირთან ერთად დაბადების დღის აღსანიშნად ჩამოფრინდა. მის ვიზიტს საქართველოში სამოქალაქო აქტივისტების პროტესტი მოჰყვა, რომლებსაც პოლიტიკოსებიც შეუერთდნენ. პოზნერს სასტუმრო "ვინოტელის" დატოვება, სადაც ის სტუმრებთან ერთად ვახშმობდა, პროტესტის ფონზე, პოლიციის კორდონის საშუალებით, მოუწია.

სამოქალაქო აქტივისტებმა და ოპოზიციური პარტიის წევრებმა რუსი ჟურნალისტის "ვინოტელში" ყოფნის დროს სასტუმროს დროებით ელექტოენერგიაც შეუწყვიტეს. სასტუმრო "ვინოტელი" კი შრომის ინსპექციის სამსახურმა აკრძალული საქმიანობის განხორციელებისთვის, 10 000 ლარით დააჯარიმა.