მოსამართლეები, რომლებსაც ამოეწურებათ სამოსამართლეო ვადა, სამ წლიან პრობაციას არ გაივლიან და უვადოდ დაინიშნებიან. ამის შესახებ იუსტიციის მინისტრმა იუსტიციის უმაღლესი საბჭოს წევრებთან და დიპლომატიურ კორპუსთან შეხვედრისას განაცხადა, რომელიც ამ წუთებში სასტუმრო "რედისონ ბლუ ივერიაში" მიმდინარეობს. მისი თქმით, სასმართლო რეფორმის ის ნაწილი, სადაც საუბარი იყო მოსამართლეთა დანიშვნის წესზე, კონკრეტულად კი მოსამართლე რომელსაც იუსტიციის საბჭო აირჩევდა მოსამართლედ სამ წლიანი გამოსაცდელი ვადის შემდეგ თუ მას დისციპლინური გადაცდენა არ ექნებოდა, შემდეგ უვადოდ ინიშნებოდა. ეს ეხებოდა იმ მოსამართლეებს რომლებსაც ეწურებოდათ სამოსამართლეო ვადა, თუმცა ამაზე განსხვავებული პოზიცია ჰქონდა ვენეციის კომისიას და ევროპარლამენტს. "თქვენ, ვენეციის კომისიას და ევროპარლამენტს გაქვთ ერთი პოზიცია. მე მაქვს სხვა პოზიცია. ეს ეხება იმ მოსამართლეებს რომლებიც ამთავრებენ ვადას და ავტომატურად უნდა დაინიშნონ. მე ეს არ მომწონს. ჩემი პოზიცია არ მოსწონს ვენეციის კომისიას. სულ ახლახანს ევროპარლამენტმა თქვა, რომ ეს არ არის სწორი. შესაბამისად, მე ვიხევ უკან და ვუჯერებ ვენეციის კომისიას და ევროპარლამენტს და იმ მოსამართლეებისთვის, რომლებმაც ათი წელი იმსახურეს სასამართლოში, პრობაციის ვადა გაუქმდება",-განაცხადა თეა წულუკიანმა იუსტიციის საბჭოს წევრებთან შეხვედრაზე.