ამ დროისთვის, ნინოწმინდის პანსიონი 20-მა არასრულწლოვანმა დატოვა, მათ შორის 7 შშმ ბავშვია. ამის შესახებ სახელმწიფო ზრუნვის სააგენტოს, თბილისის საქალაქო ცენტრის ბავშვზე ზრუნვის განყოფილების ხელმძღვანელმა, გვანცა ღონღაძემ განაცხადა.

"ამ ეტაპზე პანსიონიდან გასულია 20 არასრულწლოვანი. მათ შორის არის შვიდი შეზღუდული შესაძლებლობების სტატუსის მქონე არასრულწლოვანი. ბავშვები გადანაწილებულები არიან სახელმწიფო ზრუნვის ალტერნატიულ სერვისებში. ესენია მცირე საოჯახო ტიპის სახლი, მინდობითი აღზრდა. ზოგიერთი არასრულწლოვანი ამ ეტაპზე განთავსებულია ბიოლოგიურ ოჯახში", - განაცხადა ღონღაძემ.

სახელმწიფო ზრუნვის სააგენტოს სოციალური მუშაკები 3 დღეა ნინოწმინდის პანსიონში იმყოფებიან და აფასებენ იქ მცხოვრები ბავშვების მდგომარეობას.

საქალაქო სასამართლოს 5 ივნისის განჩინებით, ჯანდაცვის სამინისტროსა და სახელმწიფო ზრუნვის სააგენტოს დაევალათ, დაუყოვნებლივ დაიწყოს პანსიონიდან ბავშვების ზრუნვის ალტერნატიულ ფორმებში გადაყვანა.

საპატრიარქო არ ეთანხმება სასამართლოს გადაწყვეტილებას და მის გასაჩივრებას გეგმავს.