თბილისში, პუშკინის ქუჩაზე უძველესი, არაბული წარწერა დააზიანეს. სოციალურ ქსელში გავრცელებულ ფოტოებზე ჩანს, რომ წარწერა, სავარაუდოდ ფისით (ე.წ. გუდრონით) არის გადაღებილი.

კულტურის სპეციალისტ ცირა ელისაშვილი განცხადებით, ეპიგრაფიკული წარწერა ჩვენი წელთაღრიცხვით მე-8, მე-9 საუკუნეების მიჯნაზე უნდა იყოს შესრულებული. სწორედ ცირა ელისაშვილმა გაავრცელა თავდაპირველად, ვანდალური ფაქტის ამსახველი ფოტოები სოციალურ ქსელში.

"თბილისში სულ 3 ეპიგრაფიკული არაბულ წარწერიანი ძეგლია ნაპოვნი. ერთი სეიდაბადში (მე-7 ს.), მეორე სოფელ დიღომთან მაჩხანში (მე-9 ს.) და მესამე 2012 წელს გამოვლინდა, პუშკინის ქუჩაზე, ძველ გალავანში ჩაშენებული ლოდის სახით, რომელზეც 6 სტრიქონიანი ამოკაწრული არაბული წარწერაა დატანილი. პირველი 4 სტრიქონი არ იკითხება. ბოლო ორი - ნაწილობრივ. წარწერა არაბული კალიგრაფიის ქუფურ სტილს განეკუთვნება. ტექსტი გვამცნობს, რომ წარწერა შესრულებულია სალლამ იბნ ჰაბბანის ან ჰაიანის მიერ ჰაჯის მეორე საუკუნეში, ანუ ჩვენი წელთაღრიცხვით მე-8 , მე-9 საუკუნეების მიჯნაზე.

ეს წარწერა ქვიშაქვაზეა გაკეთებული. ქვიშაქვა რბილი და პრობლემური ქვაა, გამოქარვისა და გაფხვიერებისკენ მიდრეკილი. ვიღაც ვანდალმა, გადაწყვიტა თბილისში არაბული კვალის მოსპობა და ცხელი გუდრონით გადაშალა წარწერა! ეს არის კანონის კულტურული მემკვიდრეობის შესახებ მუხლი 31-ს დარღვევა, რაც ძეგლის განზრახ დაზიანებას ნიშნავს და ისჯება სისხლის სამართლის კოდექსით!", - წერს ცირა ელისაშვილი.

ვანდალურ ფაქტს გამოეხმაურა კულტურული მემკვიდრეობის დაცვის სააგენტო და განაცხადა, რომ წარწერის აღდგენა დაწყებულია.

"პუშკინის ქუჩაზე მდებარე არქეოლოგიურ კომპლექსზე 19 ივნისს ვანდალურად გადაღებილი წარწერის რესტავრაციას, საქართველოს კულტურის, სპორტისა და ახალგაზრდობის სამინისტროს შეტყობინების საფუძველზე, კულტურული მემკვიდრეობის დაცვის ეროვნული სააგენტო დარგის სპეციალისტებთან ერთად უზრუნველყოფს.

დღეს გაცემული ნებართვის საფუძველზე, ძველი გალავნის კარიბჭის კედელში ჩაშენებულ უძველეს არაბულ წარწერიან ქვიშაქვის ფილაზე აღდგენით სამუშაოებს უკვე აწარმოებენ სააგენტოს არქიტექტორ-რესტავრატორი და შპს „იუკონი და კომპანიას“ კონსერვაციის სპეციალისტი", – აცხადებენ უწყებაში.