ვაქცინა არის, უნდა ავიცრათ, სხვანაირად სიკვდილიანობა არ გაჩერდება, - აცხადებს დაავადებათა კონტროლის ეროვნული ცენტრის ხელმძღვანელის მოადგილე პაატა იმნაძე.

მისი განცხადებით, ეპიდემიოლოგიური ვითარება მძიმდება და ერთადერთი გამოსავალი ვაქცინაციაა.

"ეპიდვითარება მძიმდება. გზა არის ერთი, ვაქცინა არის, უნდა ავიცრათ, სხვანაირად კორონა, უფრო სწორად, სიკვდილიანობა არ გაჩერდება.

მთავარია, რომ ის რაც არსებობს [რეგულაციები] დღეს უნდა დავიცვათ. არიან ადამიანები ვინც სხვის შეცდომებზე სწავლობენ. ძალიან დიდი იმედი მაქვს, საკუთარ შეცდომებზე მაინც ვისწავლით, კიდევ ერთხელ ვამბობ, იღუპებიან ჩვენი ახლობლები, ჩვენი მეგობრები, ჩვენი ნათესავები. რა გითხრათ აღარ ვიცი, მსხვერპლშეწირვას ემსგავსება ჩვენი ქორწილები და ქელეხები.

კონკრეტული მაგალითების მოყვანაც შემიძლია, სამწუხაროდ ვერ დავასახელებ, ეს იქნება გარკვეული პირადი ინფორმაციები. ქელეხის შემდეგ მსხვერპლი შეწირეს გარდაცვლილს და კიდევ ერთი ადამიანი კორონათი დაიღუპა, ახლახანს მოხდა ერთ-ერთ რაიონში," - აცხადებს პაატა იმნაძე.