ტელეკომპანია "იმედმა" "ევროპულ საქართველოს" პოლიტიკური რეკლამის გაშვებაზე უარი უთხრა. ტელეკომპანიის ადმინისტრაცია, რეკლამის არგაშვების მიზეზად, მისი "სიძულვილის ენის შემცველი" შინაარსით ხსნის.

"ტელეკომპანია "იმედი" სიძულვილის ენის შემცველი წინასაარჩევნო პოლიტიკური რეკლამის ეთერში განთავსებაზე უარს ამბობს, რომელ პოლიტიკურ პარტიასაც არ უნდა ეკუთვნოდეს ეს რეკლამა. პირველი პოლიტიკური ძალა, რომელმაც "იმედის" ეთერში გასვლისთვის სიძულვილის ენის შემცველი პოლიტიკური რეკლამა მოიტანა, არის "ევროპული საქართველო". არხი უარს ამბობს მსგავსი შინაარსის სარეკლამო რგოლების ეთერში განთავსებაზე და ამის შესახებ წერილობით რამდენიმე წუთში აცნობებს "ევროპულ საქართველოს". "ტელეიმედის" საეთერო დრო სიძულვილის ენის ტირაჟირებას არ დაეთმობა", - ნათქვამია ტელეკომპანიის განცხადებაში.

"იმედის" გადაწყვეტილებას უკვე გამოეხმაურა "ევროპული საქართველო", რომელიც აცხადებს, რომ სამართლებრივი ზომების მიღებას აპირებს.

"ტელეკომპანია "იმედმა" საქართველოს კანონმდებლობის დარღვევით, ევროპული საქართველოს უფასო პოლიტიკური რეკლამა დაბლოკა და მიზეზად სიძულვილი დაასახელა.

"ევროპული საქართველო" სამართლებრივ ზომებს მიიღებს.

მანამდე სხვა არხებით და ინტერნეტით გთხოვთ მოგვმართოთ თუ იცით კორუფციის უტყუარი ფაქტების შესახებ, თუ პოლიტიკური ნიშნით სოციალურ დახმარებას გიხსნიან ან სხვაგვარად გდევნიან.

ერთად დავამარცხოთ ივანიშვილის მოღალატე და კორუმპირებული რეჟიმი და ერთად ვიმოძრავოთ საბჭოთა საქართველოდან ევროპულ საქართველოში", - ნათქვამია პარტიის განცხადებაში.