"ერთიანი ნაციონალური მოძრაობა", პენიტენციურ დაწესებულებებში არსებული ეპიდემიოლოგიური ვითარების გამო, ფართო ამნისტიის ინიციატივით გამოდის. ამის შესახებ პარტიის ოფისში გამართულ ბრიფინგზე "ნაციონალური მოძრაობის" წევრმა, სოფო ჯაფარიძემ განაცხადა.

ჯაფარიძის განცხადებით, ციხეებში ეპიდაფეთქების გამო უნდა გამოცხადდეს ფართო ამნისტია და მსუბუქი და ნაკლებად მძიმე დანაშაულებებისთვის მსჯავრდებული პირები დაუყოვნებლივ გათავისუფლდნენ.

"გამოვდივარ ფართო ამნისტიის ინიციატივით, რაც ითვალისწინებს მსუბუქ, ნაკლებად მძიმე დანაშაულებებში მსჯავრდებული ადამიანების მყისიერ გათავისუფლებას. ცხადია იმ ადამიანების, რომლებიც საზოგადოებისთვის საფრთხეს არ წარმოადგენენ. დღეს ჩვენ სხვა გამოსავალი არ გვაქვს, უნდა გადავარჩინოთ თითოეული მათგანის სიცოცხლე. ჩვენ ჯერ არ ვიცით რა მასშტაბებთან გვაქვს საქმე, მაგრამ იქიდან გამომდინარე შემიძლია ვივარაუდო, რა რაოდენობის პატიმრის ოჯახის წევრი, პირადად მე და ჩემი გუნდის წევრებს ყოველდღიურად გვიკავშირდებიან, რომ ეს მასშტაბი არაა მცირე. ისინი არიან ძალიან ბევრნი და სჭირდებათ ჩვენი დახმარება. ჩვენ ვართ ომში, სადაც დადგა დრო, რომ ამ ადამიანებისთვის ციხის კარი უნდა გავაღოთ", - თქვა სოფო ჯაფარძემ.