რა ვერსიებზეც არ უნდა ისაუბროს, ეს ჩემთვის დამაჯერებელი ვერ იქნება, რადგან ხელისუფლებაში არის პარტია, რომელიც არ ერიდება არც ტყუილს, არც საზოგადოების შეცდომაში შეყვანას, - ამის შესახებ  განაცხადა „რესპუბლიკური პარტიის“ ლიდერმა, ხათუნა სამნიძემ ირაკლი ღარიბაშვილის მიერ გავრცელებული ღია წერილის შეფასებისას საუბრისას.

„რა თქმა უნდა, ჩემთვის ირაკლი ღარიბაშვილის ინსინუაციები და მითები დამაჯერებელი არ არის. მან რა ვერსიებზეც არ უნდა ისაუბროს, ეს ჩემთვის დამაჯერებელი ვერ იქნება, რადგან ხელისუფლებაში არის პარტია, რომელიც არ ერიდება არც ტყუილს, არც საზოგადოების შეცდომაში შეყვანას, არც სიძულვილის ენას, არც არანაირი ბოროტების დაბრალებას ნებისმიერ პოლიტიკურ პარტიაზე, რომელიც არ ეთანხმება მათ მოსაზრებებს და დაპირისპირებულია მათთან.

„ქართული ოცნება“ ყველა ოპოზიციური პარტიის დისკრედიტაციას ეწევა და მთელი 9 წლის განმავლობაში ჩვენ გვესმის თავდასხმები „ნაციონალურ მოძრაობაზე“. როგორც ჩანს, ძალიან გაუჭირდათ მეორე ტურების წინ და არის პანიკა. მათთვის წარმოუდგენელია, რომ ქვეყანაში იყოს ოპოზიციური მერი ან ოპოზიციური საკრებულო“, – განაცხადა ხათუნა სამნიძემ.

დღეს, ირაკლი ღარიბაშვილმა წერილი გამოქვეყნა, სადაც აღნიშნავს, რომ სააკაშვილი საქართველოში არა ციხეში შესვლის გათვლით, არამედ ხელისუფლების გადატრიალების მყარი იმედით ჩამოვიდა.