საქართველოს ბანკის მხარდაჭერით ტყიბულის რაიონში ჩირებისა და ჩურჩხელის მცირე საწარმო მოეწყო. ,,ჩაროზი"როგორც საწარმოს, ასევე მაღაზიას აერთიანებს და მომხმარებელს 8 სახეობის ჩურჩხელასა და სხვადასხვა ხილის ჩირებს სთავაზობს.

პროექტის ჯამური ღირებულება 70,000 ლარს შეადგენს. საწარმოსთვის საჭირო ინვენტარისა და დანადგარების შესაძენად,  საქართველოს ბანკის მიერ 26,500 ლარის მოცულობის ინვესტიცია განხორციელდა.
ამ ეტაპზე „ჩაროზი“ 5 ლოკაციაზეა წარმოდგენილი (ნიკორწმინდის ტაძრის მიმდებარე ტერიტორია, თბილისი მოლი, ღვინის ბუტიკი „შალიაური“ ნუცუბიძეზე, გორგასლის 1, ყველის სახლი ფალიაშვილზე). კომპანია გაყიდვებს ფეისბუქ გვერდის მეშვეობითაც ახორციელებს.
აღსანიშნავია, რომ „ჩაროზის“ პროდუქცია უკვე წარმოდგენილია უკრაინის, რუსეთისა და საფრანგეთის ბაზრებზე.
„ორგანიზაციებისა და მსხვილი ქსელური სავაჭრო ობიექტებისგან დაინტერესება უფრო და უფრო იზრდება. რამდენიმე კვირის წინ, იაპონიაში პროდუქციის პირველი ნაკადი გავაგზავნეთ. პროდუქციაზე გაზრდილი მოთხოვნის გამო, ვგეგმავთ სამომავლოდ კიდევ უფრო გავაფართოვოთ ბიზნესი და მეტად გავაქტიურდეთ საექსპორტო ბაზარზეც“, - განმარტავს ელენა ჯიშიაშვილი, „ჩაროზის“ დამფუძნებელი.