ფრაქცია „მრეწველების“ თავმჯდომარეს გოგი თოფაძეს საქართველოს პრეზიდენტთან 4 შენიშვნა აქვს. ამასთან დაკავშირებით დეპუტამა დღეს ,,კვირას” პრესკლუბში ისაუბრა.

„ჩვენ დემოკრატიულ ქვეყანას ვაშენებთ, ძალიან ბევრი ქვეყნის პირველი პირები ბევრად მკაცრ კრიტიკას იტანენ, იმიტომ რომ ეს დემოკრატიის ნაწილია. მე ერთი სიტყვა, სამედიცინო ტერმინი შემეშალა, მაგრამ სანამ გამოვიდოდი, უკვე იყო ისეთი განწყობა, რომ, რაც უნდა მეთქვა იმ დღეს, უარყოფითად იქნებოდა აღქმული. მე პრეზიდენტს 4 შენიშვნა მივეცი:

1. ქართველი კაცის საუკეთესო თვისებაა მადლიერების გრძნობა. ის, რომ დღეს პრეზიდენტია, იმის დამსახურებაა, რომ მას კოალიციამ დაუჭირა მხარი, ის კი არჩევიდან ერთ თვეში ოპოზიციაში გადავიდა.
2. შენიშვნა მივეცი მას იმის გამო, რომ გადავიდა იმ სასახლეში, რომელზეც წინასწარ იძახდა, რომ არ გადავიდოდა, რადგან მისი შენახვა ბიუჯეტს მილიონები უჯდებოდა. ამ განცხადების შემდეგ ის იქ არ უნდა შესულიყო.
3. ძალიან არ მომეწონა და ჩვენი ქვეყნის იმიჯზე უარყოფითად იმოქმედა იმან, რომ ერთი ქვეყნის 2 ხელმძღვანელი პირი ვერ თანხმდებოდა, ვინ წავიდოდა საზღვარგარეთ ამა თუ იმ ფორუმზე. ეს აქ უნდა გადაწყვეტილიყო. პრეზიდენტს უნდა ახსოვდეს, რომ ირაკლი ღარიბაშვილი „ქართული ოცნების“ ერთ-ერთი დამფუძნებელია და აქ უნდა მოელაპარაკათ და არა იქ, სადაც ყველამ დაინახა, რომ საქართველოში რაღაც არეულობაა. ეს მე პრეზიდენტს დავაბრალე, იმიტომ რომ მას უნდა გადაედგაპირველი ნაბიჯები, რომ შეთანხმებულიყვნენ, იმის მაგივრად, რომ კონფრონტაცია დაეწყოთ ქვეყნის საზიანოდ.
4. რაც არ უნდა მეთქვა მე იმ დღეს, იმ 15 წუთში ეს უარყოფითად იქნებოდა აღქმული. აჟიტირება იმაზე, რომ მე ერთი სამედიცინო ტერმინი შემეშალა, არ უნდა ყოფილიყო. მე მისი ნაშრომი 2 დღით ადრე მომიტანეს. რომ მცოდნოდა, მას ასე უყვარდა ქართველი ხალხი, ამაზე მის არჩევამდე ვილაპარაკებდი. „დაუნი“ და „დებილი“,- ამაზე იყო აგორებული მთელი თქვენი კამპანია. ზოგი არხი ახმოვანებს ისე, თითქოს მე ბოდიში პრეზიდენტს მოვუხადე. ასე არ იყო, მე ბოდიში მოვუხადე იმ ხალხს, ვის წინაშეც შემეშალა. ვთხოვ პრეზიდენტს, რომ მან თავის „მეცნიერულ ნაშრომში“ ბოდიში მოუხადოს ხალხს. მე ბოდიში მოვუხადე იმ ოჯახებს, იმ ავადმყოფებს, ვისაც ჩემი ნათქვამი შეეხო. ისე, უნდა გითხრათ, რომ დაუნი უფრო მსუბუქი დაავადებაა, ვიდრე დებილობა“,- განაცხადა გოგი თოფაძემ.