საქართველოს სოფლის მეურნეობის მინისტრი, ოთარ დანელია და სამეგრელო-ზემო სვანეთის მხარის გუბერნატორი ლევან შონია ზუგდიდის მუნიციპალიტეტში დარჩელის დამშრობი სისტემის სარეაბილიტაციო სამუშაოებს ადგილზე გაეცნენ. მიმდინარე სამუშაოებს სოფლის მეურნეობის სამინისტროს შპს ,,საქართველოს მელიორაცია“ ახორციელებს.

            როგორც კომპანიის გენერალურმა დირექტორმა, ლევან დვალმა აღნიშნა, კომპანია ზუგდიდის მუნიციპალიტეტში ხობი - ენგურის მდინარეთაშორის მასივზე დარჩელის დამშრობი სისტემის რეაბილიტაციას ახორციელებს. სარეაბილიტაციო სამუშაოების ღირებულება 252 000 ლარს შეადგენს.   პროექტის ფარგლებში სისტემის 24 კმ. სიგრძის სადრენაჟე არხი აღდგება. სარეაბილიტაციო სამუშაოების დასრულების შემდეგ, მიმდინარე წლის აპრილიდან, სოფელ დარჩელის მოსახლეობა დამატებით 450 ჰექტარ სასოფლო-სამეურნეო მიწის ფართობზე ისარგებლებს სადრენაჟე მომსახურებით.

            დღეისათვის სოფლის მეურნეობის სამინისტროს შპს „საქართველოს მელიორაცია“ სამეგრელოს რეგიონში სამელიორაციო სისტემების 2 სარეაბილიტაციო პროექტს ახორციელებს.

            2012 წლიდან დღემდე რეგიონში დასრულდა სამელიორაციო ინფრასტრქუტურის 21 სარეაბილიტაციო პროექტი. შედეგად დაშრობილი სასოფლო-სამეურნეო სავარგულები სამეგრელოში 16 350 ჰექტრამდე გაიზარდა.