მოსკოვი მოითხოვს, რომ ნატო-მ ოფიციალურად გაიწვიოს 2008 წელს მიღებული გადაწყვეტილება იმის შესახებ, რომ საქართველო და უკრაინა  ალიანსის წევრები გახდებიან, - ამის შესახებ განაცხადა რუსეთის საგარეო საქმეთა მინისტრის მოადგილე სერგეი რიაბკოვმა.

„ჩვენ ვსაუბრობთ აბსოლუტურად მტკიცედ, ჩვენ მოვითხოვთ, რომ ნატო-მ ოფიციალურად გაიწვიოს 2008 წლის ბუქარესტის სამიტის გადაწყვეტილება იმის შესახებ, რომ უკრაინა და საქართველო ნატო-ს წევრები გახდებიან“, - განაცხადა რიაბკოვმა ჟურნალ „მეჟდუნაროდნაია ჟიზნთან“ ინტერვიუში.

 „ჩვენ ვამბობთ, რომ ნატო-ს შემდგომი გაფართოება უნდა გამოირიცხოს“, - აღნიშნა მან.

მისი თქმით, ალიანსის საქმიანობა „უნდა დაბრუნდეს იმ პოზიციაზე, რომელიც ნატო-რუსეთის თანამშრომლობის დამფუძნებელი აქტის ხელმოწერის მომენეტში არსებობდა“.

რუსეთმა 17 დეკემბერს გამოქვეყნა მის მიერ შედგენილი შეთანხმების პროექტები, სადაც ნატო-სა და აშშ-ისგან უსაფრთხოების გარანტიებია მოთხოვნილი.

დოკუმენტი გამორიცხავს ნატო-ს შემდგომ გაფართოებას და მის შემადგენლობაში უკრაინის მიღებას.

დოკუმნტში მოსკოვი ვაშინგტონს მოუწოდებს არ განათავსოს შეიარაღება და სამხედროები იქ, სადაც სხვა ქვეყნის მიერ ეს ეროვნული უსაფრთხოების საფრთხედ იქნება აღქმული, ასევე თავი შეიკავოს თავისი ცის მიღმა მძიმე ბომბდამშენების გაშვებისა და საბრძოლო ხომალდების გაგზავნისგან იმ წყლებში, საიდანაც შესაძლებელი იქნება სხვა ქვეყნის ტერიტორიისთვის დარტყმების მიყენება.

ამის გარდა, რუსეთი ალიანსს სთავაზობს არ განათავოს ბირთვული იარაღი აშშ-ის ფარგლებს გარეთ, აიღოს უკვე განთავსებული შეიარაღება და გაანადგუროს შესაბამისი ინფრასქტრუქტურა.