საქართველოში ნატო-ს დარტყმითი სისტემების განლაგება შექმნის გარდაუვალ საფრთხეს რუსეთის ფედერაციისა და მისი მოკავშირეებისთვის, მოსკოვისთვის ეს „წითელი ხაზია“, - ამის შესახებ რუსეთის საგარეო საქმეთა მინისტრის მოადგილემ ანდრეი რუდენკომ „რია ნოვოსტისთან“ ინტერვიუში განაცხადა.

„ნატო-ში საქართველოს გაწვერიანება და მის ტერიტორიაზე შეიარაღების დარტყმითი სისტემების განთავსება, ჩვენთვის „წითელ ხაზს“ წარმოადგენს, რადგან ასეთი ქმედებები ფუნდამენტურად შეცვლის სამხრეთ კავკასიაში ძალების სამხედრო-პოლიტიკურ განლაგებას და რეგიონში რუსეთსა და მის მოკავშირეებს გარდაუვალ საფრთხეს შეუქმნის“, - განაცხადა მან.

ამასთან, რუდენკომ აღნიშნა, რომ მხარს უჭერს საქართველოსთან მშვიდობიან თანაარსებობას და თანასწორუფლებიან თანამშრომლობას. „რუსეთი მხარს უჭერს მშვიდობიან თანაცხოვრებასა და თანასწორუფლებიან თანამშრომლობას ყველა სახელმწიფოსთან, მათ შორის ჩვენ მეზობლებთან სამხრეთ კავკასიაში. ეს დამოკიდებულება სრულად ვრცელდება საქართველოზეც. იმის მიუხედავად, რომ თბილისს გაწყვეტილი აქვს ორ სახელმწიფოს შორის კავშირი“, - განაცხადა რუდენკომ.

მანამდე რუსეთის საგარეო საქმეთა მინისტრის მოადგილემ სერგეი რიაბკოვმა განაცხადა, რომ მოსკოვი ნატოსგან მოითხოვს ოფიციალურად გაიწვიოს 2008 წლის ბუქარესტის გადაწყვეტილება, რომლის თანახმადაც, საქართველო და უკრაინა ნატო-ს წევრები გახდებიან.