თბილისის საქალაქო სასამართლოში  მამუკა ხაზარაძის, ბადრი ჯაფარიძისა და ავთანდილ წერეთლის პროცესი ხმაურისა და სიტყვიერი დაპირისპირების ფონზე მიმდინარეობს.

„ლელოს“ ლიდერ მამუკა ხაზარაძესა და პროკურორს შორის სიტყვიერი დაპირისპირება მოხდა, რის შემდეგაც მოსამართლემ ხაზარაძე სხდომათა დარბაზიდან გააძევა.

„სამი წელია, ბოდავთ და თავი შეიკავეთ. ვის ელაპარაკებით თქვენ ზრდილობაზე, რამე არ შეგეშალოთ. ეს არ არის სასამართლო, ბიძინას მონები ხართ“, – მიმართა ხაზარაძემ პროკურორს.

გენერალურმა პროკურატურამ მამუკა ხაზარაძისა და ბადრი ჯაფარიძის ბრალდების შესახებ დადგენილება 2019 წლის 24 ივლისს გამოიტანა. საგამოძიებო უწყების ცნობით, ხაზარაძესა და ჯაფარიძეს ბრალდება წარედგინათ მათ მიერ ჯგუფურად, 16 754 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება.

მოსამართლემ შესაძლოა, გადაწყვეტილება დღესვე გამოაცხადოს,  ან გადაწყვეტილების გამოცხადების თარიღი დანიშნოს. გამამტყუნებელი განაჩენის შემთხვევაში ბრალდებულებს 12 წლამდე პატიმრობა ემუქრებათ.