პარლამენტის მიერ ბადრი ჯაფარიძისთვის, ელენე ხოშტარიასა და შალვა ნათელაშვილისთვის  სადეპუტატო უფლებამოსილების შეწყვეტას საქართველოს ყოფილი პრეზიდენტი მიხეილ სააკაშვილი სოციალურ ქსელში ეხმიანება.

სააკაშვილის თქმით, "ქართული ოცნება" ამით ცდილობს მასზე არაადამიანური მოპყრობისა და წამების შემსწავლელი კომისიის შექმნა შეფერხდეს და აუცილებელ 50 ხმას 3 ხმა დააკლდეს.

"პარლამენტში, კომისიის შექმნის წინ, სამ დეპუტატს სადეპუტატო უფლებამოსილება გაუუქმეს, რათა კომისიის შექმნისთვის აუცილებელ 50 ხმას დააკლდეს 3 ხმა. შეგახსენებთ, ეს არაა პირველი შემთხვევა, როცა ადამიანებს ხსნიან იმისთვის, რომ სიმართლე არ გაცხადდეს.

მინისტრი ტიკარაძე პრაქტიკულად ჩემს საქმეს გადაჰყვა;

ლონდა თოლორაიას მოსახსნელად ცალკე კანონი მიიღეს;

მოხსნეს გორის ჰოსპიტლის დირექტორი, ჰოსპიტლის რამდენიმე თანამშრომელი და დააქვეითეს ჩემი მკურნალი ექიმი;

მოხსნეს ციხის ადმინისტრაციის მიერ მოწვეული ნევროლოგის მეუღლე, რომელიც ჯანდაცვის სამინისტროში დეპარტამენტს ხელმძღვანელობდა. მოხსნეს მხოლოდ იმიტომ, რომ დაეთანხმა სახალხო დამცველის და "ემპათიას" კონსილიუმების დიაგნოზს.

და ეს ყველაფერი მოხდა "ოცნების" მოლაპარაკე თავების უტიფარი მტკიცების ფონზე, რომ მათ არაფერი აქვთ დასამალი და არანაირ წამებას ადგილი არ ჰქონია, - წერს მიხეილ სააკაშვილი.

შეგახსენებთ, ცოტა ხნის წინ, პარლამენტმა ბადრი ჯაფარიძეს, ელენე ხოშტარიასა და შალვა ნათელაშვილს სადეპუტატო უფლებამოსილება შეუწყვიტა.