დავაკვირდებით მოვლენების განვითარებას და ამის მიხედვით გვექნება ჩვენი პოლიტიკური რეაქცია, - ამის შესახებ „ქართული ოცნების“ თავმჯდომარე ირაკლი კობახიძემ უკრაინასთან დაკავშირებით საუბრისას განაცხადა.

მისი თქმით, საქართველომ უკრაინელი ხალხის მიმართ სოლიდარობა მკაფიოდ დააფიქსირა და ის ერთ-ერთი იშვიათი გამონაკლისია, რომელმაც საპარლამენტო რეზოლუციის დონეზე გამოხატა მხარდაჭერა და სოლიდარობა უკრაინელი ხალხის მიმართ.

"საქართველო არის ერთ-ერთი იშვიათი გამონაკლისი, რომელმაც საპარლამენტო რეზოლუციის დონეზე მხარდაჭერა და სოლიდარობა გამოხატა ჩვენი მეგობარი უკრაინელი ხალხის მიმართ. ჩვენი პოზიცია ამ თვალსაზრისით არის, რა თქმა უნდა, მკაფიო. სოლიდარობა უკრაინელი ხალხის მიმართ არის ძალიან მკაფიო და ჩვენი სურვილი ისევ და ისევ არის უკრაინაში ომის არ დაშვება. თუმცა, ტენდენცია არის ძალიან ცუდი, ძალიან სამწუხარო და შეიძლება მივიღოთ შეუქცევადი ნეგატიური პროცესები. ჩვენ, რა თქმა უნდა, დავაკვირდებით მოვლენების განვითარებას და ამის მიხედვით გვექნება ჩვენი პოლიტიკური რეაქცია, სხვადასხვა განვითარების შემთხვევაში". - თქვა ირაკლი კობახიძემ.

მმართველმა პარტიამ უკრაინის მხარდამჭერი რეზოლუცია მიიღო, რომელშიც რუსეთი ნახსენები არ არის.