უკრაინის ხელისუფლებას მიაჩნია, რომ საქართველოს დღევანდელი ხელისუფლება საკუთარი პოლიტიკით არათუ არ ეხმარება უკრაინის სახელმწიფოს, არამედ ხელს უწყობს რუსეთის სამხედრო ინტერვენციის და ომის ამოცანების განხორციელებას, - განაცხადა პარტია „ლელოს“ წევრმა სალომე სამადაშვილმა.

მისი თქმით, ახლა დღის წესრიგში აყენებენ მოთხოვნას, საქართველოს პარლამენტმა სასწრაფოდ დაიწყოს მუშაობა, რათა მოითხოვონ ევროკავშირის მიერ დაწესებულ სანქციებთან ნაწილობრივ მაინც დაუყოვნებლივ მიერთება.

„უკრაინის სახელმწიფომ მიიღო უპრეცედენტო გადაწყვეტილება და საქართველო რუსეთის შემდეგ გახდა ის სახელმწიფო, საიდანაც გაიწვია კონსულტაციებისთვის საგანგებო და სრულუფლებიანი ელჩი. მინდა, ავუხსნა საზოგადოებას, რას ნიშნავს ეს დიპლომატიურ ენაზე – უკრაინის ხელისუფლებას მიაჩნია, რომ საქართველოს დღევანდელი ხელისუფლება საკუთარი პოლიტიკით არათუ არ ეხმარება უკრაინის სახელმწიფოს, არამედ ხელს უწყობს რუსეთის სამხედრო ინტერვენციის და ომის ამოცანების განხორციელებას, რაც არის უკრაინის სახელმწიფოს გაუქმება.

ჩვენ მმართველ უმრავლესობას არაერთხელ მოვუწოდეთ, ჩაგვეტარებინა პარლამენტის საგანგებო სხდომა, მივმართეთ, მოგვეწვია დღეს აქ ელჩი, რომელიც პლენარული სხდომიდან მიესალმებოდა და გაამხნევებდა უკრაინელ ხალხს.

ამის ნაცვლად, ის გაწვეულია და ახლა ვაყენებთ დღის წესრიგში მოთხოვნას, სასწრაფოდ დაიწყოს საქართველოს პარლამენტმა მუშაობა, რათა მოვითხოვოთ ევროკავშირის მიერ დაწესებულ სანქციებთან ნაწილობრივ მაინც დაუყონებლივ მიერთება საქართველოს სახელმწიფოს მხრიდან. ეს არის გადაუდებელი აუცილებლობა, რომ დავიცვათ ჩვენი სახელმწიფო“, – განაცხადა სალომე სამადაშვილმა.

შეგახსენებთ, დღეს, ვოლოდიმირ ზელენსკიმ განაცხადა, რომ უკრაინის წინააღმდეგ აგრესიის გამართლებისა და მოხალისეებისთვის დაბრკოლებების გამო, უკრაინა სქართველოდან დაუყოვნებლივ იწვევს ელჩს.