საქართველოს პრეზიდენტ სალომე ზურაბიშვილსა და ამერიკის სახელმწიფო მდივან ენტონი ბლინკენს შორის სატელეფონო საუბარი შედგა.

სატელეფონო საუბრის შემდეგ, სალომე ზურაბიშვილმა და ენტონი ბლინკენმა სოციალურ ქსელებში მოკლე განცხადება გააკეთეს.

საუბრის შესახებ განცხადება გაავრცელა სახელმწიფო დეპარტამენტის პრესსპიკერმა ნედ პრაისმა.

"სახელმწიფო მდივანი ენტონი ბლინკენი დღეს საქართველოს პრეზიდენტს სალომე ზურაბიშვილს ესაუბრა რუსეთის ხელისუფლების განზრახ, არაპროვოცირებულ და გაუმართლებელ თავდასხმაზე გლობალური პასუხის შესახებ და რუსეთის მიერ საქართველოს განგრძობადი ოკუპაციის შესახებ.

სახელმწიფო მდივანმა მადლიერება გამოხატა ქართველი ხალხისა და პირადად, პრეზიდენტ ზურაბიშვილის მიმართ უკრაინის ურყევი მხარდაჭერისათვის.

მან ხაზი გაუსვა აშშ-ს მტკიცე ერთგულებას საერთაშორისოდ აღიარებულ საზღვრებში საქართველოს სუვერენობისა და ტერიტორიული მთლიანობის მიმართ და აღნიშნა, რომ აშშ გააგრძელებს ქართველი ხალხის მხარდაჭერას დემოკრატიული, მშვიდობიანი და ევროატლანტიკური მომავლისაკენ სვლაში", - აღნიშნულია სახელმწიფო დეპარტამენტის ინფორმაციაში.