მოსკოვში, "ლუჟკინის" სტადიონზე იმართება აქცია-კონცერტი, სადაც ყირიმის ანექსიის მე-8 წლისთავს ზარ-ზეიმით აღნიშნავენ.

კონცერტზე სიტყვით გამოვიდნენ რუსეთის პრეზიდენტი ვლადიმირ პუტინი და მოსკოვის მერი სერგეი სობიანინი.

სტადიონზე შეკრებილ ადამიანებს რუსეთის დროშები და Z სიმბოლოებით გაფორმებული ლენტები უჭირავთ ხელში

მოქალაქეებს სიტყვით მიმართეს კრემლის პროპაგანდისტული მანქანის მესვეურებმა, საგარეო საქმეთა სამინისტროს სპიკერმა მარია ზახაროვამ, RT-ის მეთაურმა მარგარიტა სიმონიანმა და "გაზპრომ მედიას" გენერალური დირექტორის მოადგილემ თინა კანდელაკმა.

თინა კანდელაკმა თავისი სიტყვით გამოსვლა იმის აღნიშვნით დაიწყო, რომ იგი საქართველოში დაიბადა, თუმცა 1995 წლის შემდეგ, რუსეთი მისთვის მეორე სამშობლო გახდა. "რუსეთმა მიგვიღო და შეგვიყვარა ყველა".

კანდელაკის თქმით, რუს ერს ვერავინ დააჩოქებს.

"ისინი [დასავლეთი] ცდილობენ წაშალონ მთელი ერი, როგორც ანგარიშები სოციალურ ქსელებში, ეს ყველაფერი იმიტომ, რომ ჩვენ რუსულად ვსაუბრობთ... ჩვენ აღმოვაჩინეთ ანტარქტიდა, გამოვიგონეთ ჯილეხისა და კორონავირუსის წამალი", - ამბობს კანდელაკი. "ჩვენ ვერ გაგვტეხენ, ვერ დაგვაჩოქებენ".