რუსეთის თავდაცვის სამინისტროს განცხადებით, რუსეთის არმიამ უკრაინაში სამიზნეების გასანადგურებლად "კინჟალის" ჰიპერბგერითი რაკეტები გამოიყენა.

თავდაცვის სამინისტროს სპიკერის კონაშენკოვის განცხადებით, ჰიპერბგერითი რაკეტების საშუალებით გაანადგურეს მიწისქვეშა სამხედრო საწყობი დასავლეთ უკრაინაში.

კონაშენკოვის მტკიცებით, საწყობში განთავსებული იყო რაკეტები და "უკრაინის ჯარების საავიაციო საბრძოლო მასალა".

"18 მარტს "კინჟალის" საავიაციო სარაკეტო სისტემამ ჰიპერბგერითი აერობალისტიკური რაკეტებით გაანადგურა რაკეტების დიდი მიწისქვეშა საწყობი და უკრაინის ჯარების საავიაციო საბრძოლო მასალა სოფელ დელიატინში, ივანო-ფრანკოვსკის ოლქში", - განაცხადა აგრესორი ქვეყნის წარმომადგენელმა.

კონაშენკოვმა ასევე განაცხადა, რომ რუსულმა ძალებმა გამოიყენეს ხომალდსაწინააღმდეგო სარაკეტო სისტემა "ბასტიონი" უკრაინის სამხედრო ობიექტების წინააღმდეგ, ოდესის შავი ზღვის პორტის მახლობლად.

რუსეთს აქამდე არასოდეს დაუდასტურებია, რომ საბრძოლო მოქმედებებში ჰიპერბგერითი რაკეტები გამოიყენა.

რუსეთის სამხედრო ძალების მტკიცებით, "კინჟალის" სარაკეტო სისტემას შეუძლია სამიზნეების განადგურება 2000 კმ-ზე მეტ მანძილზე და აქვს უნარი გადალახოს ყველა არსებული საჰაერო და რაკეტსაწინააღმდეგო თავდაცვის სისტემა.

რუსეთმა პირველად გამოიყენა ეს იარაღი სირიაში სამხედრო კამპანიის დროს 2016 წელს.