რუსეთის "პირველი არხი" რედაქტორ მარინა ოვსიანიკოვას, რომელიც პირდაპირ ეთერში ომის საწინააღმდეგო პლაკატით შეიჭრა, ბრიტანეთის ჯაშუშობაში ადანაშაულებს.

ოვსიანოკოვას ჯაშუშობაში დადანაშაულებას, "პირველი არხის" გენერალური დირექტორის მოადგილემ კირილ კლეიმენოვმა სპეციალური მიმართვა მიუძღვნა, სადაც განაცხადა, რომ "სავარაუდოდ, ოვსიანიკოვა ბრიტანეთის დაზვერვისთვის მუშაობდა".

თავის ვიდეომიმართვაში კლეიმენოვი ამტკიცებს, რომ პროტესტამდე ცოტა ხნით ადრე "ოვსიანიკოვა ბრიტანეთის საელჩოს დაეკონტაქტა".

კლეიმენოვმა ასევე განაცხადა, რომ ოვსიანიკოვამ "უღალატა თავის ქვეყანას".

"ოვსიანიკოვამ გვიღალატა ყველას... ცივად, ორგულად, ბონუსისთვის", - თქვა კლეიმეოვნმა.

გაერთიანებული სამეფოს საგარეო საქმეთა და თანამეგობრობის ოფისმა უარყო რაიმე კონტაქტი მარინა ოვსიანიკოვასთან.

"ჩვენ არ გვქონია კონტაქტი ოვსიანიკოვასთან. ეს არის მორიგი ტყუილი, რომელსაც დეზინფორმაციის მანქანა ავრცელებს", - თქვა საგარეო საქმეთა ოფისმა.

შეგახსენებთ, 14 მარტს, საღამოს, რუსეთის პირველი არხის საინფორმაციო გადაცემა "ვრემიას" ეთერში, რედაქტორი მარინა ოვსიანიკოვა შევიდა, რომელსაც ხელში ეჭირა პლაკატი წარწერით: "არა ომს. არ დაუჯეროთ პროპაგანდას. თქვენ აქ გატყუებენ. რუსები ომის წინააღმდეგ".

კადრში გამოჩენიდან მალევე, მარინა ოვსიანიკოვა ადმინისტრაციული წესით დააკავეს. მოგვიანებით, სასამართლომ ოვსიანიკოვა 30 000 რუბლით დააჯარიმა.