საქართველოდან ბუჩაში 9-კაციანი საპარლამენტო დელეგაცია ჩავა - შემადგენლობაში პარლამენტის სპიკერის გარდა, იქნება უმრავლესობის სამი და ოპოზიციის ხუთი დეპუტატი.

სახელები და გვარები დაზუსტებულია, ახლა ისინი გამგზავრების თარიღზე უნდა შეთანხმდენენ.

დელეგაციას საკანონმდებლო ორგანოს თავმჯდომარე, შალვა პაპუაშვილი უხელმძღვანელებს.

ვიზიტში მონაწილეობას ასევე მიიღებენ: მმართველი გუნდიდან - არჩილ თალაკვაძე, დავით სერგეენკო და ბექა ოდიშარია, ოპოზიციიდან კი ლევან იოსელიანი, გიორგი ხოჯევანიშვილი, ხათუნა სამნიძე, ვახტანგ მეგრელიშვილი და ანა ნაცვლიშვილი.

„ნაციონალურმა მოძრაობამ“ და „ევროპელმა სოციალისტებმა“ უკრაინაში წასვლაზე უარი თქვეს.

შალვა პაპუაშვილმა უკრაინაში ვიზიტისთის მზადყოფნა გამოთქვა, საკითხთან დაკავშირებით კონსულტაციები საპარლამენტო ოპოზიციასთანაც მიმდინარეობდა, თუმცა მხარეები დელეგაციის შემადგენლობაზე ვერ შეთანხმდნენ. მოგვიანებით კი „ლელოში“ განაცხადეს, რომ მათი წარმომადგენელი მზად იქნება მონაწილეობა მიიღოს როგორც ოპოზიციური პარტიების დელეგაციაში, ისე პარლამენტის თავმჯდომარის დაგეგმილ ვიზიტში უკრაინაში.

შემდეგ კი მამუკა მდინარაძემ განაცხადა, რომ „ქართული ოცნება“ მზად არის საპარლამენტო დელეგაციის შემადგენლობაში ყველა ოპოზიციური პოლიტიკური ჯგუფის თითო წარმომადგენელი შევიდეს.