ევროპული საბჭოს პრეზიდენტის, შარლ მიშელის განცხადებით, ომში უკრაინა გაიმარჯვებს და ის ამ ბრძოლაში მარტო არ არის.

მან ამის შესახებ ტვიტერზე დაწერა, რომელიც პრეზიდენტ ვოლოდიმირ ზელენსკისთან შეხვედრის შემდეგ გამოაქვეყნა.

„თქვენ მარტო არ ხართ, ჩვენ თქვენთან ერთად, გვერდიგვერდ ვდგავართ“, – განაცხადა შარლ მიშელმა.

შარლ მიშელი უკრაინაში დღეს ჩავიდა. მანამდე დასახლება ბოროდიანკა მოინახულა, სადაც ბუჩის მსგავსად რუსებმა ომის დანაშაულები ჩაიდინეს.

„შევხვდი ხალხს და სიტყვები არ მყოფნის, გამოვხატო, რა ვიგრძენი არა როგორც ევროპული საბჭოს პრეზიდენტმა, არამედ როგორც მამამ, როგორც ადამიანმა. ეს არის სისასტიკე, ეს არის სამხედრო დანაშაული და მისი ჩამდენი აუცილებლად უნდა დაისაჯოს და აუცილებლად დაისჯება. მათ უნდა გადაიხადონ საფასური იმისთვის, რაც გააკეთეს უკრაინის ბევრ ქალაქში. ახლა, ისე როგორც თქვენ, მე ვფიქრობ ხალხზე, ჯარისკაცებზე, მშვიდობიან მოქალაქეებზე დონბასში, მარიუპოლში, სხვა ქალაქებში, რომლებიც იბრძვიან საკუთარი სიცოცხლისთვის, საკუთარი სუვერენიტეტისთვის და იბრძვიან ევროპული ღირებულებებისთვის, თავისუფლებისა და დემოკრატიული პრინციპებისთვის“, – განაცხადა შარლ მიშელმა უკრაინის პრეზიდენტ ვოლოდიმირ ზელენსკისთან ერთად გამართულ პრესკონფერენციაზე.