საქართველოს ეკლესიის საპატრიარქო მეუფე ნიკოლოზის განცხადებას ეხმიანება, სადაც ის ამბობს, რომ მიხეილ სააკაშვილის კლინიკაში გადაყვანა პატრიარქისა და პრემიერის შეხვედრის შედეგია.

საპატრიარქოს განცხადებით, პატრიარქის და პრემიერის შეხვედრა არ გამხდარა სააკაშვილის კლინიკაში გადაყვანის მიზეზი

"გუშინ, 2022 წლის 15 მაისს, ჟურნალისტებთან საუბრისას ახალქალაქის, კუმურდოსა და კარის მიტროპოლიტმა ნიკოლოზმა (ფაჩუაშვილი) კომენტარი გააკეთა პრეზიდენტ მიხეილ სააკაშვილის საავადმყოფოში გადაყვანასთან დაკავშირებით და აღნიშნა, რომ ეს არის საქართველოს პრემიერ-მინისტრ ირაკლი ღარიბაშვილის სრულიად საქართველოს კათოლიკოს-პატრიარქ ილია II-სთან შეხვედრის შედეგი.

საქართველოს საპატრიარქო მოხარულია, რომ ბატონი მიხეილის ჯანმრთელობის მდგომარეობის გაუმჯობესების მიზნით, მოხდა მისი საავადმყოფოში გადაყვანა, რათა მას სათანადო სამედიცინო დახმარება გაეწიოს. თუმცა დავძენთ, რომ კათოლიკოს-პატრიარქსა და პრემიერს შორის გამართული საუბარი ამ საკითხს არ ეხებოდა და, ამდენად, ეს შეხვედრა არ გამხდარა ზემოაღნიშნულის მიზეზი", - ნათქვამია განცხადებაში.