თბილისში "მთავარი არხის" გენერალური დირექტორის, ნიკა გვარამიას დაპატიმრება გააპროტესტეს.

სოლიდარობის მარში რესპუბლიკის მოედნიდან დაიწყო და რუსთაველის გამზირისკენ გაგრძელდა. მოქალაქეთა ნაწილმა "მთავარი არხის" შენობასთან გადაინაცვლა.

საპროტესტო მსვლელობაში მონაწილეობას იღებდნენ ჟურნალისტები, მედიამეჯენერები, სამოქალაქო აქტივისტები, პოლიტიკოსები და რიგითი მოქალაქეები.

თბილისის პარალელურად, სოლიდარობის აქცია გაიმართა ბათუმშიც. მოქალაქეები 6 მაისის პარკში შეიკრიბნენ, ნიკა გვარამიას დაკავება დაგმეს და "მთავარ არხს" მხარდაჭერა გამოუცხადეს.

16 მაისს სასამართლომ ნიკა გვარამიას 3 წლითა და 6 თვით პატიმრობა მიუსაჯა. მოსამართლემ ნიკა გვარამია დამნაშავედ ცნო სისხლის სამართლის კოდექსის 220-ე მუხლით - უფლებამოსილების ბოროტად გამოყენებაში.

პროკურატურა მთავარი არხის დამფუძნებელს ნიკა გვარამიას ჯერ კიდევ რუსთავი 2-ის დირექტორობის დროს, ტელეკომპანიის კუთვნილი ქონების დიდი ოდენობით გაფლანგვას, კომერციულ მოსყიდვას, ყალბი ოფიციალური დოკუმენტის დამზადებასა და გამოყენებას, ასევე უკანონო შემოსავლის ლეგალიზაციას ედავებოდა.

საერთაშორისო უფლებადამცველი ორგანიზაცია, Amnesty International-ი ნიკა გვარამიას მიმართ გამოტანილ განაჩენს პოლიტიკურად მოტივირებულად მიიჩნევს.