დონეცკის საოლქო ადმინისტრაციის ხელმძღვანელის ინფორმაციით, უკრაინის კონტროლირებად ტერიტორიაზე მდებარე  ქალაქების - ლიმანისა და ბახმუტის სარაკეტო და საარტილერიო დაბომბვის შედეგად, 10 მშვიდობიანი მოქალაქე დაიღუპა, მათ შორის ორი ბავშვია. დაიჭრა კიდევ შვიდი ადამიანი.

უკრაინის შეიარაღებული ძალების ინფორმაციით, 18 მაისს რუსეთის სარაკეტო და საარტილერიო დარტყმების ქვეშ მოყვა ათობით დასახლებული პუნქტი. შედარებით აქტიური ბრძოლები მიმდინარეობს ლუჰანსკისა და დონეცკის ოლქებში.

ბახმუტში დაღუპულები მრავალსართულიანი სახლის ნანგრევებიდან ამოიყვანეს. მათ შორის ორი წლის ბავშვი. ამის შესახებ ტელეგრამ-არხზე დონეცკის საოლქო ადმინსიტრაციის ხელმძღვანელი პაველ კირილენკო წერს.

უკრაინელი სამხედროების მონაცემებით, საერთო ჯამში უკრაინაში 18 მაისს 15 მშვიდობიანი მოქალქე დაიღუპა.

ხარკოვს ოლქში რუსეთის ცეცხლის ქვეშ მოექცა რამდენიმე დასახლებული პუნქტი, არიან დაშავებულები. დაღუპულების შესახებ ინფორმაცია არ ვრცელდება.

ხარკოვის საოლქო ადმინისტრაციის ხელმღვანელის ოლეგ სინეგუბოვის თქმით, ხარკოვის ოლქში, ხარკოვსა და სხვა ქალაქებში უკრაინის ჯარების წარმატებული წინსვლის შემდეგ მოქალაქეები თავიანთ საცხოვრებელ სახლებს უბრუნდებიან. თუმცა მისივე თქმით, ეს ჯერ კიდევ საშიშია.

უკრაინული მედიის ინფორმაციით, გვიან საღამოს აფეთქებების ხმები ისმოდა ლვოვსა და ვინიცაშიც, ასევე კონოტოპში. აღნიშნული ინფორმაციები ოფიციალურად ჯერ არ დადასტურებულა.