არა მგონია, ქართველი ხალხის ნება იყოს ან ჩვენი წინაპრების ოცნება, რომ ლიბერასტების ჩრდილოვან კაბინეტს გადავცეთ ხელისუფლება, - აჭარის მთავრობის ხელმძღვანელმა, თორნიკე რიჟვაძემ ჰომოფობიური და შეურაცხმყოფელი განცხადება მთავრობის სხდომაზე გააკეთა. ის გამოეხმაურა მოძრაობა "შინ ევროპისკენ" მოწოდებებს პრემიერ-მინისტრ ღარიბაშვილის გადადგომისა და ეროვნული თანხმობით დროებითი ტექნიკური მთავრობის ჩამოყალიბების შესახებ.

"ყველას კარგად ესმის, პირველ რიგში, ხალხს, რომ რადიკალური ნაწილი ცდილობს, მათ შორის ეს მიმდინარე წარმატებული აღდგენა [ტურიზმის], ნებისმიერი საშუალებით დააზიანონ, გამოიწვიონ გარკვეული უკმაყოფილება მოსახლეობაში, თუმცა ისინი ამ მიზანს ვერ მიაღწევენ და დაბეჯითებით შემიძლია ვთქვა, რომ ჩვენ აუცილებლად დავიკავებთ, ჩვენი ქვეყანა, ჩვენს ღირსეულ ადგილს, მათ შორის ევროპულ ოჯახში. თუმცა არა მგონია, ქართველი ხალხის ნება იყოს ან ჩვენი წინაპრების ოცნება, რომ ლიბერასტების ჩრდილოვან კაბინეტს გადავცეთ ხელისუფლება. ასე რომ ყველაფერი მიდის გეგმის შესაბამისად და ამ ქვეყანაში იქნება უზრუნველყოფილი, როგორც მშვიდეობა, ასევე სტაბილური განვითარება", - თქვა რიჟვაძემ.