საქართველოს პარლამენტის წევრი სოზარ სუბარი, რომელმაც გუშინ "ქართული ოცნების" რიგები დატოვა, რათა მისი თქმით, საზოგადოების ინფორმირება დამოუკიდებელი დეპუტატის რანგში მოეხდინა, საქართველოს პრეზიდენტს სალომე ზურაბიშვილს ძალაუფლების უზურპაციაში ადანაშაულებს.

ტელეარხ "იმედის" ეთერში საუბრისას, სოზარ სუბარმა თქვა, რომ სალომე ზურაბიშვილმა საკუთარი ინიაციტივით დანიშნა სხდომა პარლამენტში, რაც ძალაუფლების უზურპაციაა.

"პირველივე ჯერზე, როდესაც სალომე ზურაბიშვილი მოდიოდა სწორედ ამ გზავნილით და პარლამენტში უნდა გაეჟღერებინა, თვითმფრინავიდან დაიწყეს რეკვა და თვითმფრინავიდან დანიშნეს სხდომა.

მესიჯი გაუგზავნეს პარლამენტის თავმჯდომარეს, რომელსაც ჰქონდა შეხვედრა . მისწერა, ახლა ამაზე ვერ ვილაპარაკებთ შეხვედრა მაქვს, მოვრჩები და შეგეხმიანებით. პრეზიდენტი ზის თვითმფრინავში და ცოტა ხანში პარლამენტის თავმჯდომარე იღებს მეორე მესიჯს, რომ სხდომა არის დანიშნული. რა ჰქვია ახლა ამას? ეს არის ერთგვარი უზურპაციაც კი ძალაუფლების, რადგან პრეზიდენტს არ აქვს უფლება დანიშნოს სხდომა. პარლამენტის წინაშე მოხსენება ნიშნავს, რომ პარლამენტი გიწვევს. მინიმუმ შეთანხმებით ხდება. ორი კონსტიტუციური უწყებაა. თვითმფრინავიდან დანიშნა სხდომა, რაღაცა სასწრაფო მაქვს სათქმელი, ისეთი, რომელსაც ჩემს გარდა ვერავინ ვერ იტყვის, ევროპაში მქონდა მნიშვნელოვანი შეხვედრებიო. როდესაც მოვიდა ერთი კვირის შემდეგ, არცერთი სიტყვა არ უთქვამს იმ ევროპულ შეხვედრებზე. სრულიად სხვაგან წაიყვანა თემა იმიტომ, რომ არაფერი ჰქონდა სათქმელი. არაფერი არ იყო საჩქარო. გვაქვს ინფორმაცია, რომ პრეზიდენტმა კანდიდატის სტატუსთან დაკავშირებით მიიღო შეთავაზება", - განაცხადა სოზარ სუბარმა.

სოზარ სუბარი სავარაუდოდ გულისხმობს პრეზიდენტის საპარლამენტო მოხსენების წარდგენას, რომელიც თავდაპირველად, პრეზიდენტის სურვილით 5 მარტს უნდა გამართულიყო, თუმცა მაშინ პარლამენტის ბიურომ უარი თქვა პრეზიდენტის შეთავაზებულ თარიღზე.