რუსთაველის გამზირზე საპროტესტო აქციისთვის "შინ ევროპისკენ" მზადება უკვე დაწყებულია.

დღეს, 20:00 საათზე მოქალაქეები პარლამენტის წინ შეიკრიბებიან და შემდგომი დღეების სამოქმედო გეგმას გამოაცხადებენ.

სამოქალაქო მოძრაობის განცხადებით, აქციის მონაწილეები რუსთაველის გამზირზე ღამის გათენებას გეგმავენ.

"ამაღამ ვრჩებით რუსთაველის გამზირზე. ჩვენ ერთმანეთის ძალა უნდა ვნახოთ, უნდა ვნახოთ როგორი მტკიცეა ჩვენი ნება. ამიტომ ვისაც შეგიძლიათ დარჩენა, აუცილებლად მოემზადეთ ამისთვის, თბილი სამოსიც წამოიღეთ, იქონიეთ ტელეფონის დამტენი საშუალებები. ჩვენ ადგილზე დაგახევდრებთ ბევრ საინტერესო ეპიზოდს...

ვნახოთ უკვე "ქართული ოცნება" რას დაუპირისპირებს ამ ჩვენ მშვიდობიან პროტესტს და ჩვენ არავის, კიდევ ერთხელ ვამბობ, არავის, არცერთი წამით არ მოვუწოდებთ არანაირი ძალადობისკენ, პირიქით", - ამბობს ტვ "პირველის" ეთერში მოძრაობა "სირცხვილიას" ერთ-ერთმა წევრმა გიგა მაქარაშვილმა.

3 ივლისს თბილისში სახალხო მოძრაობის, "შინ ევროპისკენ" ორგანიზებით მორიგი აქცია გაიმართება. თბილისში დაგეგმილ აქციას რეგიონებიდან უერთდებიან. აჭარა, კახეთი, იმერეთი, სამეგრელო, გურია - სხვადასხვა ქალაქიდან თბილისის მიმართულებით მოქალაქეები უკვე გამოემართნენ.

შეგახსენებთ, 24 ივნისს, რუსთაველის გამზირზე გამართულ აქციაზე, მოძრაობამ "შინ ევროპისკენ" წამოაყენა მთავარი მოთხოვნები - ერთი კვირის ვადაში პრემიერ-მინისტრისა და მთავრობის გადადგომა და ეროვნული თანხმობით მთავრობის ჩამოყალიბება, რომელიც ევროკომისიის რეკომენდაციის 12-ვე პუნქტს შეასრულებს.

მოძრაობის მესვეურებმა ამ მოთხოვნების შესასრულებლად ხელისუფლებას 1-კვირიანი ვადა მისცეს.